అధిష్టానానికి వివరిస్తా, రాజీనామాపై చర్చించలేదు: డి శ్రీనివాస్

By Srinivas

Published: Friday, March 4, 2011, 12:39 [IST]

హైదరాబాద్: తెలంగాణ ప్రాంతానికి చెందిన కాంగ్రెసు పార్టీ శాసనసభ్యులు, శాసనమండలి సభ్యులు తమ అభిప్రాయాన్ని తనకు తెలియజేశారని, దీనిని పార్టీ అధిష్టానం దృష్టికి తీసుకు వెళతానని ప్రదేశ్ కాంగ్రెసు కమిటీ అధ్యక్షుడు డి శ్రీనివాస్ శుక్రవారం మీడియా ప్రతినిధులతో మాట్లాడుతూ చెప్పారు. తెలంగాణ ప్రాంత కాంగ్రెసు ఎమ్మెల్యేలు, ఎమ్మెల్సీలతో భేటీ అనంతరం ఆయన మాట్లాడారు. ప్రస్తుత పరిస్థితుల దృష్ట్యా అసెంబ్లీని బహిష్కరించడం మినహా మరో అవకాశం లేక పోయిందని వారు తనకు చెప్పారని అన్నారు. అందరి ఆలోచనలను తీసుకొని అధిష్టానం వద్దకు వెళతానని చెప్పారు. అందరూ తమ వాదనలు వినిపించి అధిష్టానానికి సూచనలు ఇవ్వాలని కోరినట్లు చెప్పారు.

తెలంగాణ కోసం ఒత్తిడి తీసుకు రావాలని కోరినట్లు చెప్పారు. అయితే పార్టీ ఎమ్మెల్యేలు, ఎమ్మెల్సీలతో రాజీనామాలపై మాత్రం చర్చించలేదన్నారు. రాజీనామా ప్రస్తావన రాలేదన్నారు. కాగా ప్రస్తుత పరిణామాలను పూర్తిగా డిఎస్‌కు వివరించామని తెలంగాణ కాంగ్రెసు ప్రజాప్రతినిధులు చెప్పారు. డిఎస్ సానుకూలంగా స్పందించారన్నారు. ప్రత్యేక తెలంగాణ రాష్ట్రం సాధనకు అందరం కలిసి పని చేయాల్సిన ఆవశ్యకత ఎంతైనా ఉందన్నారు. ఏ నిర్ణయం తీసుకున్నా అందరం కలిసి మూకుమ్మడిగా తీసుకుంటామని చెప్పారు. తెలంగాణ ఏర్పాటు బాధ్యత అందరిపైనా ఉందన్నారు.

Published On March 4, 2011