పుట్టపర్తిలో తిరిగి ప్రతిష్టించిన గ్రామ దేవత సత్తెమ విగ్రహం

అనంతపురం: అనంతపురం జిల్లా పుట్టపర్తిలో గ్రామదేవత సత్తెమ్మ విగ్రహాన్ని తిరిగి ప్రతిష్టించారు. పుట్టపర్తిలోని సత్యమ్మ ఆలయంలో 7 నెలల కిందట అమ్మవారి విగ్రహాన్ని తొలగించడంవల్లే బాబా ఆరోగ్యం క్షీణించిందని భావించిన భక్తులు మంగళవారం ఆ విగ్రహాన్ని బుక్కపట్నం చెరువులో నుంచి వెలికితీశారు. యథాప్రకారం పూర్వస్థానంలో ప్రతిష్ఠించారు. సత్యమ్మ అమ్మవారు మహిమలు గలదని ఇక్కడి ప్రజల విశ్వాసం. 7 నెలల క్రితం విగ్రహం స్వల్పంగా దెబ్బతినడంతో తొలగించి సత్యసాయి ట్రస్టు సభ్యులు రత్నాకర్‌ ఆధ్వర్యంలో కొత్త విగ్రహాన్ని ఏర్పాటు చేశారు. తొలగించిన విగ్రహాన్ని సమీపంలోని బుక్కపట్నం చెరువులో నిమజ్జనం చేశారు.

అప్పటి నుంచీ పుట్టపర్తికి అరిష్టం జరుగుతోందని భక్తుల నుంచి ఆరోపణలొస్తున్నాయి. ఈ నేపథ్యంలోనే రత్నాకర్‌ కారు ప్రమాదానికి గురయ్యారని, బాబా ఆరోగ్యం క్షీణించిందని ప్రచారం జరిగింది. దీంతో ప్రజలు సోమవారం రాత్రి నుంచి చెరువులో తీవ్రంగా గాలించారు. మంగళవారం ఉదయం విగ్రహాన్ని వెలికితీశారు. అమ్మవారిని మంగళ వాయిద్యాలు, మేళతాళాలతో ఊరేగింపుగా పుట్టపర్తికి తీసుకువచ్చి యథాస్థానంలో ప్రతిష్ఠింపజేశారు. దారిపొడవునా మహిళలు రంగవల్లులు తీర్చిదిద్దారు. హారతులు పట్టారు.

English summary

Village deity Sattemma statue is re erected Puttaparthi of Anantapur district. Villagers felt that Sathya Saibaba's health is deteriorated due to removal of Sattemma statue.