చంద్రబాబు కొడుకు అసమర్థుడు, బిస్కట్లు ఇచ్చి ఆడిస్తున్నాడు: లక్ష్మీపార్వతి

By Srinivas

Published: Monday, April 11, 2011, 15:02 [IST]

చిత్తూరు: తెలుగుదేశం పార్టీ అధ్యక్షుడు చంద్రబాబునాయుడు తనయుడు లోకేష్ కుమార్ రాజకీయాలకు అసమర్థుడని, అలాంటి అప్రయోజకుడిని అందలమెక్కించడానికి బాబు నందమూరి కుటుంబంపై కుట్ర చేస్తున్నారని ఎన్టీఆర్ టిడిపి అధ్యక్షురాలు లక్ష్మీపార్వతి సోమవారం తిరుపతిలో ధ్వజమెత్తారు. చంద్రబాబు వల్ల ఎన్టీఆర్ కుటుంబం, పార్టీ చాలా నష్టపోయిందన్నారు. ఇకనైనా పార్టీని చేతిలోకి తీసుకొని నష్టాన్ని జరగకుండా చేయడానికే రాజ్యసభ సభ్యుడు హరికృష్ణ బాబు అవినీతిపై లేఖ సంధించారన్నారు. లోకేష్‌ను వారసుడిగా ప్రకటించడానికి చంద్రబాబు ప్రయత్నాలు చేస్తున్నాడన్నారు.

అవినీతిపై చంద్రబాబు పోరాటం చేయడం హస్యాస్పదం అన్నారు. వేలకోట్ల కుంభకోణాల్లో ఇరుక్కు పోయిన చంద్రబాబు అవినీతిపై పోరాటం చేయడానికి అనర్హుడన్నారు. ఆయనకు అవినీతిపై మాట్లాడే హక్కే లేదన్నారు. నందమూరి కుటుంబానికి బిస్కెట్లు ఇచ్చి ఇష్టమొచ్చినట్లు బాబు ఆడిస్తున్నాడన్నారు.

Published On April 11, 2011