జూ.ఎన్టీఆర్‌తో కలిసి చంద్రబాబు ఇంటికి హరికృష్ణ: పెళ్లికి ఆహ్వానం

హైదరాబాద్: రాజ్యసభ సభ్యుడు నందమూరి హరికృష్ణ ఆదివారం ఉదయం తన తనయుడు జూనియర్ ఎన్టీఆర్‌తో కలిసి తెలుగుదేశం పార్టీ అధ్యక్షుడు చంద్రబాబునాయుడు ఇంటికి వెళ్లారు. ఎన్టీఆర్ పెళ్లి సందర్భంగా హరికృష్ణ తన బంధువుల ఇళ్లకు స్వయంగా ఎన్టీఆర్‌ను తోడ్కొని వెళ్లి పెళ్లి పత్రికలు పంచుతున్నారు. ఇందులో భాగంగా ఆదివారం ఉదయం గ.8.30 నుండి 9 గంటల ప్రాంతంలో హరికృష్ణ, ఎన్టీఆర్‌లు కలిసి చంద్రబాబు ఇంటికి వెళ్లారు. విభేదాల దృష్ట్యా హరికృష్ణ, జూ.లు చంద్రబాబును కలవడం ప్రాధాన్యత సంతరించుకుంది.

మే 5వ తారీఖున లక్ష్మీ ప్రణతితో ఎన్టీఆర్ పెళ్లికి రావాలని హరికృష్ణ ఆయనను ఆహ్వానించారు. అయితే గత కొద్దిరోజులుగా ఇరు కుటుంబాల మధ్య ఉన్న గొడవలు ఈ సమయంలో చర్చకు రాలేదని తెలుస్తోంది. అందరి ఇళ్లకు వెళ్లి పత్రికలు పంచుతున్నట్లుగానే చంద్రబాబు ఇంటికి వెళ్లి పంచినట్లుగా సమాచారం. దీంతో ఎలాంటి రాజకీయ చర్చలకు అవకాశం లేదని తెలుస్తోంది. కేంద్రమంత్రి పురందేశ్వరి నందమూరి కుటుంబాన్ని నారా కుటుంబం నుండి దూరం చేయాలని హరికృష్ణను పావుగా వాడుకుంటుందన్న వివాదం బహిర్గతమయిన విషయం తెలిసిందే.

English summary

Harikrishna went to TDP president Chandrababu Naidu with young hero Jr.NTR to invete NTR's marriage with Laxmi Pranathi.