లోకేష్ పేరు ఎత్తకండి, జగన్ వర్గం లిస్టు ఇవ్వండి: చంద్రబాబు

చిత్తూరు: పార్టీలో ఇప్పుడిప్పుడే లోకేష్ కుమార్ ప్రస్తుతం తీసుకు రావద్దని తెలుగుదేశం పార్టీ అధ్యక్షుడు నారా చంద్రబాబునాయుడు శుక్రవారం చిత్తూరు జిల్లా నాయకులకు సూచించారు. ఆయన తిరుపతిలో పార్టీ నేతలతో సమావేశం అయ్యారు. ఈ సందర్భంగా నేతలకు పలు విషయాల్లో అధినేత క్లాస్ పీకినట్టుగా తెలుస్తోంది. గతంలో చంద్రగిరి నియోజకవర్గం ఇంచార్జిగా లోకేష్ కుమార్‌ను నియమించాలనే డిమాండ్ రావటం ఆ తర్వాత కుటుంబంలో చిచ్చు రేగిన నేపథ్యంలో చంద్రబాబు పార్టీ నాయకులకు ఆ ప్రస్తావన తీసుకు రావద్దని కోరారు. పార్టీలో చేరుతున్న ప్రజారాజ్యం పార్టీ కార్యకర్తలతో సమన్వయం చేసుకోవాలని వారికి సూచించారు.

జిల్లాలో వైయస్ జగన్మోహన్ రెడ్డి స్థాపించిన వైయస్ఆర్ కాంగ్రెసు పార్టీ వేపు మొగ్గు చూపుతున్న పార్టీ నాయకుల పేర్లు తయారు చేయాలని ఆయన జిల్లా నేతలకు ఆదేశించారు. వారిపై పార్టీ పరమైన చర్యలు తీసుకొనడానికి వెనుకాడే ప్రసక్తి లేదని తేల్చి చెప్పారు. స్థానిక సంస్థల ఎన్నికలు ఎప్పుడు వచ్చిన క్యాడర్ సిద్ధంగా ఉండాలని ఆయన సూచించారు. స్థానిక ఎన్నికలలో మంచి ఫలితాలు సాధించాలని చెప్పారు. తిరుపతి, చిత్తూరు నియోజకవర్గాలకు ఇంచార్జులను తర్వాత నియమిస్తానని చెప్పారు. కాగా ఎమ్మెల్యేలు బొజ్జల గోపాలకృష్ణ, గాలి ముద్దు కృష్ణమనాయుడు చంద్రబాబు సమావేశం జరుగుతున్న సమయంలోనే ముభావంగా బయటకు వచ్చారు. అయితే వారు మీడియాతో మాట్లాడటానికి నిరాకరించారు. కాగా అంతకుముందు ఆయన తిరుచానూరు పద్మావతి అమ్మవారిని దర్శించుకున్నారు.

English summary

TDP chief Chandrababu Naidu suggested his party leaders to do not raise Lokesh name in politics. He also asked leaders to list out who were went with YS Jagan.