తెలంగాణ టిడిపి ఎమ్మెల్యేల రాజీనామా, మారిన వైఖరి

By Srinivas

Published: Monday, July 4, 2011, 12:09 [IST]

హైదరాబాద్: తెలుగుదేశం పార్టీ తెలంగాణ ప్రాంత శాసనసభ్యులు రాజీనామాలు చేశారు. వరంగల్ జిల్లా శాసనసభ్యుడు రేవూరి ప్రకాశ్ రెడ్డి సోమవారం ఉదయం తన రాజీనామాను మొదట డిప్యూటీ స్పీకర్ మల్లు భట్టి విక్రమార్కకు సమర్పించారు. అనంతరం అందరు టిడిపి శాసనసభ్యులు తమ రాజీనామాను సమర్పించారు. మొత్తం 33 మంది టిడిపి శాసనసభ్యులు రాజీనామా చేశారు. ఇప్పటికే ఆదివారం టిడిపి నుండి బహిష్కరింపబడిన నాగం జనార్దన్ రెడ్డి, ఆయనతో ఉంటున్న హరీశ్వర్ రెడ్డి, వేణుగోపాలచారి, జోగు రామన్నలు సైతం రాజీనామాలు సమర్పించారు. ఇప్పటికే ఆదివారం నాగం బృందం రాజీనామా చేసింది. మొదట కాంగ్రెసు పార్టీ శాసనసభ్యులు రాజీనామా చేస్తేనే చేయాలని నిర్ణయించుకున్న తెలుగుదేశం పార్టీ ఇప్పుడు మాత్రం వారు చేసినా చేయకున్నా రాజీనామా చేయాలని నిర్ణయించుకున్నారు.

టిడిపి శాసనసభ్యులు అందరూ వెళ్లి డిప్యూటీ స్పీకర్‌కు తమ రాజీనామా పత్రాలను సమర్పించారు. అనంతరం వారు మీడియాతో మాట్లాడుతూ తాము స్పీకర్ ఫార్మాట్ ప్రకారమే రాజీనామాలు సమర్పించినట్లు చెప్పారు. ప్రత్యేక తెలంగాణ రాష్ట్రం సంపాదించాలనే కోరికతో తాము రాజీనామా చేస్తున్నట్లు చెప్పారు. తెలంగాణ కోసం రాజీనామా సంక్షోభం సృష్టించడానికి తాము సిద్ధమని గతంలో ప్రకటించిన మాదిరిగానే ఇప్పుడు సిద్ధంగా ఉన్నామన్నారు. నాలుగుకోట్ల తెలంగాణ ప్రజల కోసమే రాజీనామాలకు సిద్దపడ్డట్టు చెప్పారు. తెలుగుదేశం పార్టీని విమర్శించే నేతలు ఇప్పటికైనా టిడిపి చిత్తశుద్ధిని గుర్తు పెట్టుకోవాలన్నారు. టిడిపిని విమర్శించడం మానుకోవాలని సూచించారు.

Published On July 4, 2011