ఆత్మహత్యలకు సిద్ధమా?: రాములమ్మలకు గోనె సవాల్

By Srinivas

Published: Wednesday, August 10, 2011, 13:42 [IST]

హైదరాబాద్: తెలంగాణ ప్రాంతంలో ఆత్మహత్యలు ఉండకూడదనుకుంటే తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, ఆ పార్టీ పార్లమెంటు సభ్యురాలు విజయశాంతి పార్లమెంటు ముందు ఆత్మబలిదానాలకు సిద్ధపడితే తాను సైతం ఆత్మబలిదానానికి సిద్ధంగా ఉన్నానని వైయస్సాఆర్ కాంగ్రెసు పార్టీ నేత గోనె ప్రకాశ రావు బుధవారం సవాల్ విసిరారు. కెసిఆర్, విజయశాంతిలపై ఆయన తీవ్రస్థాయిలో మండిపడ్డారు. రాజకీయ లబ్ధి కోసమే టిఆర్ఎస్ తెలంగాణవాదం అని ఆరోపించారు. రాజకీయ లబ్ధి కోసం విద్యార్థులను, యువతను రెచ్చగొట్ట వద్దని హెచ్చరించారు.

విజయశాంతి మాయ మాటలు చెప్పవద్దని హెచ్చరించారు. నీవెక్కడ పుట్టావో తెలంగాణ ప్రజలందరికీ తెలుసన్నారు. ఆమె మద్రాసులో పుట్టి పెరిగిందన్నారు. ఆమె తాతల స్వస్థలం ఆంధ్రా అని చెప్పారు. కెసిఆర్ దీక్ష బోగస్ అని విమర్శించారు. ఆత్మహత్యల పేరిట వారు అమాయకులను రెచ్చగొడితే బావుండదన్నారు. వారికి దమ్ముంటే పరేడ్ గ్రౌండులో జాతీయ పతాకంతో పాటు తెలంగాణ జెండా సైతం ఎగుర వేయాలని డిమాండ్ చేశారు.

Published On August 10, 2011