చంద్రబాబు అమ్మెస్తే నేను కొంటా: జెసి దివాకర్ రెడ్డి

హైదరాబాద్: తెలుగుదేశం పార్టీ అధినేత, మాజీ ముఖ్యమంత్రి చంద్రబాబు నాయుడు హైదరాబాదులో ఉన్న తన ఇంటి విలువ 23 లక్షల రూపాయలుగా మాత్రమే చూపించడంపై మాజీ మంత్రి జెసి దివాకర్ రెడ్డి శుక్రవారం సవాల్ చేశారు. చంద్రబాబు తన ఇంటి విలువ రూ.23 లక్షలు అని చెబుతున్నారని ఆయన దానిని అమ్ముతానంటే తాను రెండు, మూడు, నాలుగు రెట్లు ఎక్కువగా ఇచ్చి కొంటానని దానిని తనకు ఇచ్చేస్తారా అని ప్రశ్నించారు. చంద్రబాబు తన ఆస్తుల వివరాలు ప్రకటించడం మంచిదేనని ఆయన అన్నారు.

అయితే ఆస్తి వివరాలు వాస్తవాలు చెబితే బాగుంటుందని ఆయన అభిప్రాయపడ్డారు. కాకమ్మ కథలు చెప్పడం కాదని వాస్తవాలు చెప్పాలని ఆయన సూచించారు. కాగా శుక్రవారం మధ్యాహ్నం చంద్రబాబు తన ఆస్తులు ప్రకటించిన విషయం తెలిసిందే. చంద్రబాబు తన ఆస్తుల వివరాలు ప్రకటించడంపై చేనేత జౌళి శాఖ మంత్రి శంకర్ రావు, తెలంగాణ రాష్ట్ర సమితి నేత శ్రవణ్ కుమార్ తదితరులు అందరూ స్వాగతించారు. అయితే వాస్తవాలు ప్రకటిస్తే బావుండేదని అభిప్రాయపడ్డారు. ఎన్టీఆర్ టిడిపి అధ్యక్షురాలు లక్ష్మీ పార్వతి అయితే బాబు ఆస్తుల ప్రకటనపై తీవ్రస్థాయిలో విరుచుకు పడిన విషయం తెలిసిందే.

English summary

Former minister JC Diwakar Reddy challenged TDP chief Chandrababu Naidu yesterday for his resident cost.