ముఖ్యమంత్రిపై మంత్రి కోమటిరెడ్డి వెంకటరెడ్డి ఫైర్

By Pratap

Published: Saturday, September 24, 2011, 13:48 [IST]

హైదరాబాద్: ముఖ్యమంత్రి కిరణ్ కుమార్ రెడ్డిపై తెలంగాణకు చెందిన రాష్ట్ర మంత్రి కోమటిరెడ్డి వెంకటరెడ్డి మరోసారి ఫైర్ అయ్యారు. తెలంగాణవారికి ఉద్యోగాలు రావద్దనే గ్రూప్ -1 పరీక్షను వాయిదా వేయడానికి నిరాకరిస్తున్నారని ఆయన ఆరోపించారు. బందులతో ఆటోలు, బస్సులు, రైళ్లు నడవడం లేదని, ఇటువంటి స్థితిలో అభ్యర్థులు ఎలా పరీక్షా కేంద్రాలకు వస్తారని ఆయన అన్నారు. రేపు తలపెట్టిన గ్రూప్ వన్ పరీక్షను వాయిదా వేయాలని మంత్రి జానా రెడ్డి ముఖ్యమంత్రిని కోరారని ఆయన తెలిపారు. సంబంధిత మంత్రులను కూడా సంప్రదించకుండా ముఖ్యమంత్రి ఏకపక్ష నిర్ణయాలు తీసుకుంటున్నారని అంటున్నారని, ఇప్పుడు దానిపై తాను వ్యాఖ్యానించదలుచుకోలేదని ఆయన శనివారం మీడియా ప్రతినిధులతో అన్నారు. కరెంట్ కోతతో రాష్ట్రంలో పంటలు ఎండిపోతే ముఖ్యమంత్రి బాధ్యత వహించాలని ఆయన అన్నారు. తెలంగాణలో వ్యవసాయానికి ఏడు గంటలు విద్యుత్ సరఫరా చేయాలని, అవసరమైతే పొరుగు రాష్ట్రాల నుంచి విద్యుత్తును కొనుగోలు చేయాలని ఆయన ముఖ్యమంత్రిని కోరారు.

తెలుగుదేశం తెలంగాణ ప్రాంత శాసనసభ్యులపై ఆయన తీవ్ర విమర్శలు చేశారు. తెలుగుదేశం తెలంగాణ ప్రాంత నాయకులు రోజుకో డ్రామా ఆడడం మానుకోవాలని ఆయన సూచించారు. ఇప్పటికైనా తెలుగుదేశం తెలంగాణ ఫోరం కన్వీనర్ ఎర్రబెల్లి దయాకర్ రావు సిగ్గు తెచ్చుకోవాలని ఆయన అన్నారు. ప్రతిపక్ష పార్టీగా తెలుగుదేశం పార్టీపై బాధ్యత ఉంటుందని, ఆ బాధ్యతను విస్మరించి తెలంగాణ కోసం రాజీనామాలు చేయకుండా కాంగ్రెసు శాసనసభ్యులు రాజీనామాలు చేస్తేనే తాము చేస్తామని తెలుగుదేశం తెలంగాణ ప్రాంత శాసనసభ్యులు అంటున్నారని ఆయన విమర్శించారు.

Published On September 24, 2011