లక్ష్మీ పార్వతి పిల్ కాపీ చేసిన వైయస్ విజయమ్మ?

By Srinivas

Published: Wednesday, October 19, 2011, 9:06 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు ఆస్తులపై వైయస్సార్ కాంగ్రెసు పార్టీ గౌరవ అధ్యక్షురాలు, పులివెందుల శాసనసభ్యురాలు హైకోర్టులో వేసిన పిటిషన్ మక్కీకి మక్కీయా అంటే అవుననే అంటున్నారు తెలుగుదేశం పార్టీ నేతలు. గతంలో చంద్రబాబుపై ఎన్టీఆర్ టిడిపి అధ్యక్షురాలు లక్ష్మీ పార్వతి బాబు ఆస్తులపై కోర్టుకు వెళ్లింది. ఇప్పుడు విజయమ్మ అదే కాపీతో హైకోర్టులో పిల్ వేశారని వారు ఆరోపిస్తున్నారు. అయితే లక్ష్మీ పార్వతి అని ఉన్న ప్రతి చోట విజయమ్మ అని చేర్చడం వరకు మాత్రమే పిటిషన్‌లోని మార్పు అని మిగిలినదంతా మక్కీకి మక్కీ దించారని తెదేపా నేతలు విమర్శలు చేస్తున్నారు. దీంతో గతంలో బాబు ఆస్తులపై కోర్టుకు వెళ్లి వెనక్కి తగ్గిన వారి లాగే విజయమ్మఈ పిల్ ద్వారా ఏమీ సాధించలేరని టిడిపి నేతలు అంటున్నారు. బాబు సచ్ఛీలురుగా ఈ కేసు నుండి బయట పడతారని వారు అభిప్రాయం వ్యక్తం చేస్తున్నారు.

ఇందుకు వారు దివంగత ముఖ్యమంత్రి వైయస్ రాజశేఖర రెడ్డినే ఉదాహరణగా తీసుకుంటున్నారు. బాబుపై వైయస్ ఎన్నో కేసులు వేసి వాటిని నిరూపించలేక ఉపసంహరించుకున్నారని చెబుతున్నారు. బాబు అక్రమాలకు పాల్పడి ఉంటే ఐదున్నర సంవత్సరాలు అధికారంలో ఉన్న వైయస్ ఆయనను ఎప్పుడో జైలుకు పంపే వారని అంటున్నారు. ఎలాంటి అక్రమాలకు పాల్పడక పోవటం వల్లనే బాబుపై ఎన్ని కేసులు వేసినా ఫలితం ఉండలేదని చెబుతున్నారు. మరోవైపు వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి కాంగ్రెసుతో కుమ్మక్కై ఆ పార్టీకి మరింత దగ్గర కావడానికే ఇలాంటి కుట్రలు చేస్తున్నారని ఆరోపిస్తున్నారు.

Published On October 19, 2011