పార్టీ వీడం తెలంగాణ వదలం: కొట్టిపారేసిన రాములు

By Srinivas

Published: Wednesday, November 9, 2011, 16:43 [IST]

హైదరాబాద్: తాను తెలుగుదేశం పార్టీని వీడి తెలంగాణ రాష్ట్ర సమితిలో చేరనున్నట్లు వస్తున్న వార్తలను మహబూబ్ నగర్ జిల్లా అచ్చంపేట శాసనసభ్యుడు రాములు బుధవారం ఖండించారు. తాను టీఆర్ఎస్‌లో చేరే అవకాశం లేదన్నారు. పార్టీలు మారితే తెలంగాణ వస్తుందన్న నమ్మకం తనకు లేదన్నారు. కొన్ని చానళ్లలో వచ్చిన వార్తలను చూసి తాను తీవ్ర మానసిక వేధనకు లోనయ్యానని చెప్పారు. తాను కెసిఆర్‌ను కలిసింది లేదు, కలిసే అవకాశం లేదన్నారు. అవాస్తవాలు ఎవరూ ప్రసారం చేయవద్దని కోరారు. త్వరలో కేంద్రం తీసుకునే నిర్ణయం తెలంగాణకు అనుకూలంగా ఉంటుందని ఆయన ఆశాభావం వ్యక్తం చేశారు.

జుక్కల్ శాసనసభ్యుడు హనుమంత్ షిండే కూడా తాను టిఆర్ఎస్‌లో చేరుతున్నట్లు వచ్చిన వార్తలను ఖండించారు. తాను పార్టీ మారాలనుకుంటే బాన్సువాడ శాసనసభ్యుడు పోచారం శ్రీనివాస్ రెడ్డితో పాటే వెళ్లే వాణ్నని చెప్పారు. తాను తెలుగుదేశం పార్టీలో ఉండి తెలంగాణ కోసం ఉద్యమిస్తానని చెప్పారు. కాగా హనుమంత్ షిండే, రాములుతో పాటు చొప్పదండి శాసనసభ్యుడు సుద్దాల దేవయ్య, కల్వకుర్తి శాసనసభ్యుడు జైపాల్ యాదవ్ టిఆర్ఎస్‌లో చేరుతున్నట్లు వార్తలు వచ్చిన విషయం తెలిసిందే.

Published On November 9, 2011