అమ్మాయి క్రెడిట్ కార్డు దొంగిలించిన తెలుగు టెక్కీ

By Pratap

Published: Friday, November 11, 2011, 18:48 [IST]

చెన్నై: తన సహోద్యోగిని క్రెడిట్ కార్డును దొంగిలించిన ఆంధ్రప్రదేశ్ రాష్ట్రానికి చెందిన 24 సాఫ్ట్‌వేర్ ఇంజనీరును పోలీసులు అరెస్టు చేసి బాధితురాలు ఫిర్యాదును వెనక్కి తీసుకోవడంతో వదిలేశారు. ఆ తెలుగు టెక్కీ తండ్రి ఆంధ్రప్రదేశ్‌కు చెందిన ప్రముఖ పారిశ్రామికవేత్త అని, కేసు కాకుండా చూడడానికి అతను తన ప్రాబల్యాన్ని ప్రయోగించాడని తెలుస్తోంది. ఓ అమ్మాయి చెన్నైలోని ప్రముఖ సాఫ్ట్‌వేర్ కంపెనీలో పనిచేస్తోంది. వారం రోజుల క్రితం కార్యాలయంలో తన క్రెడిట్ కార్డు పోవడంతో పోలీసులకు ఫిర్యాదు చేసింది. ఆ కార్డు ద్వారా అడియార్‌లోని ఓ షోరూం నుంచి ఖరీదైన సెల్‌ఫోన్ కొనుగోలు చేసినట్లు పోలీసులు కనిపెట్టారు.

కార్డుపై పేరు తుడిచేయడంతో అమ్మాయి పేరు కనిపించలేదు. దీంతో సంబంధిత పత్రాలను సమర్పిస్తానని సెల్‌ఫోన్ చేసిన వ్యక్తి హామీ ఇచ్చాడని షోరూం సేల్స్ పర్సన్స్ చెప్పారు. మొబైల్‌తో పాటు షోరూం ఉద్యోగి ఆ టెక్కీ ఫోటో తీశాడు. ఆ ఫొటోను తీసుకుని పోలీసులు అమ్మాయికి చూపించారు. అతను తన సహోద్యోగి అని తెలుసుకుని ఆమె దిగ్భ్రాంతికి గురైంది. ఆరోపణలను తెలుగు టెక్కీ మొదట అంగీకరించలేదు. సాక్ష్యం చూపించడంతో అంగీకరించాడు. తాను ఫిర్యాదును వెనక్కి తీసుకుంటున్నట్లు బాధితురాలు చెప్పింది. దీంతో అతన్ని పోలీసులు వదిలేశారు.

Published On November 11, 2011