భయపడి ఆమోదించారు, బాబు వైఖరితోనే వీడా: నాగం

By Srinivas

Published: Sunday, November 13, 2011, 17:51 [IST]

హైదరాబాద్: శాసన సభ స్పీకర్ నాదెండ్ల మనోహర్ తన రాజీనామాను భయపడి ఆమోదించారని తెలంగాణ నగారా సమితి చైర్మన్, మాజీ మంత్రి నాగం జనార్ధన్ రెడ్డి ఆదివారం అన్నారు. నాదెండ్ల రాజీనామా ఆమోదించక పోవడంతో నాగం హైకోర్టుకు వెళ్లిన విషయం తెలిసిందే. అయితే అదే రోజు నాదెండ్ల ఆయన రాజీనామా ఆమోదించారు. దీనిపై నాగం స్పందిస్తూ స్పీకర్ భయపడే తన రాజీనామా ఆమోదించారని మిగిలిన నేతల రాజీనామాలు కూడా అలాగే ఆమోదించాలని డిమాండ్ చేశారు. అందరి రాజీనామాలు వారం రోజుల్లో ఆమోదించాలన్నారు. ముఖ్యమంత్రి కిరణ్ కుమార్ రెడ్డి, గవర్నర్ నరసింహన్, ప్రతిపక్ష నేత నారా చంద్రబాబు నాయుడు డైరెక్షన్‌లో స్పీకర్ వెళుతున్నారని ఆరోపించారు. చంద్రబాబు 2009లో తెలంగాణపై యు టర్న్ తీసుకున్నందువల్లే తాను పార్టీ వీడినట్లు చెప్పారు.

తాను ఏ పార్టీలో చేరేది లేదని తెలంగాణ కోసం పోరాడే శక్తులతో కలిసి ఉద్యమిస్తానని స్పష్టం చేశారు. తెలంగాణ ప్రజా ప్రతినిధులకు చిత్తశుద్ధి ఉంటే రాజీనామాలు చేసి వాటిని ఆమోదింపజేసుకోవాలన్నారు. తెలంగాణ రాష్ట్రం ఎలా తెస్తారో మంత్రులు ప్రజల్లోకి వెళ్లి సమాధానం చెప్పాలన్నారు. తెలంగాణ ప్రాంత కాంగ్రెసు శాసనసభ్యులు సీమాంధ్ర నేతలకు అమ్ముడు పోయారని ఆరోపించారు. రెండుసార్లు నిజామాబాద్ ప్రజలు తిరస్కరించిన డిఎస్‌కు ఎమ్మెల్సీగా కొనసాగే నైతిక హక్కు లేదన్నారు. ఉద్యమానికి కొత్త స్వరూపం తేవడానికి తెలంగాణవ్యాప్తంగా విస్తృతంగా పర్యటిస్తానన్నారు.

Published On November 13, 2011