బావకు, నా అల్లుడికి అక్రమాస్తుల్లేవు: బాలయ్య బాసట

రాజమండ్రి: తెలుగుదేశం పార్టీ అధినేత నారా చంద్రబాబు నాయుడు ఆస్తులపై ప్రాథమిక విచారణ జరపాలన్న అంశంపై హీరో నందమూరి బాలకృష్ణ బుధవారం రాజమండ్రిలో స్పందించారు. తన బావ చంద్రబాబుకు, తన అల్లుడు నారా లోకేష్ కుమార్‌కు ఎలాంటి అక్రమ ఆస్తులు లేవని బాలయ్య చెప్పారు. రాజకీయ దురుద్దేశ్యంతోనే విచారణ జరుగుతోందని అభిప్రాయపడ్డారు. పులివందుల వైయస్సార్ కాంగ్రెసు పార్టీ శాసనసభ్యురాలు వైయస్ విజయమ్మ కుట్ర పూరితంగానే పిటిషన్ వేశారన్నారు. సిబిఐ విచారణ కక్ష సాధింపేనన్నారు.

బాబుపై వేసిన పిటిషన్‌తో ఎలాంటి నష్టం లేదన్నారు. గతంలో దివంగత ముఖ్యమంత్రి వైయస్ రాజశేఖర రెడ్డి 26 కేసులు వేసి ఏమీ నిరూపించలేక పోయారన్నారు. బాబుపై విచారణలు కొత్తేమీ కాదన్నారు. కాగా తెలుగుదేశం పార్టీ అధినేత నారా చంద్రబాబు నాయుడు ఆస్తులపై ప్రాథమిక విచారణ జరిపి మూడు నెలల్లో రెండు సీల్డ్ కవర్‌లలో వివరాలు అందించాలని రాష్ట్ర అత్యున్నత న్యాయస్థానం హైకోర్టు సోమవారం సిబిఐని ఆదేశించిన విషయం తెలిసిందే. అయితే హైకోర్టు నిర్ణయంపై సుప్రీం కోర్టుకు వెళ్లే యోచన లేదని చంద్రబాబు ప్రకటించారు.

English summary

Hero Nandamuri Balakrishna supported TDP chief Nara Chandrababu Naidu today. He accused that YS Vijayamma's PIL is a political strategy.