నేనూ జైలుకెళ్లాలా?: శంకరరావు సంచలన వ్యాఖ్యలు

By Srinivas

Published: Thursday, December 1, 2011, 14:32 [IST]

హైదరాబాద్: కిరణ్ కుమార్ రెడ్డి మంత్రివర్గంలో అవినీతిపరులు ఉన్నారంటూ చేనేత, జౌళీ శాఖ మంత్రి శంకరరావు గురువారం సంచలన వ్యాఖ్యలు చేశారు. సహచర మంత్రులు ఆనం రామనారాయణ రెడ్డి, డికె అరుణపై తాను చేసిన ఆరోపణలకు కట్టుబడి ఉన్నానని చెప్పారు. ఇద్దరు మంత్రుల బంధువులకు షాద్ నగర్‌లో అక్రమంగా కేటాయింపులు జరిపారన్నారు. సిబిఐ విచారణ జరిపిస్తే అక్రమాలు బయటకు వస్తాయన్నారు. తనపై కూడా విచారణ జరిపించుకోవచ్చునని సవాల్ విసిరారు. తనను తొందరగా మంత్రివర్గం నుండి బయటకు పంపించాలని ఆ దేవుడిని ప్రార్థిస్తున్నానని చెప్పారు. అయితే తనకు తానుగా మాత్రం బయటకు వెళ్లేది లేదన్నారు.

తనను అధిష్టానమే బయటకు పంపించాలన్నారు. కేబినెట్ నుండి బయటకు వస్తేనే ప్రజలకు మరింత మేలు చేయగల్గుతామన్నారు. తాను కేబినెట్ సమావేశానికి రావడం లేదని ముఖ్యమంత్రి కిరణ్ కుమార్ రెడ్డికి ఎస్సెమ్మెస్ పంపించానన్నారు. మంత్రివర్గంలో ఉండమంటే ఉంటా పొమ్మంటే పోతానని సిఎంను ఉద్దేశించి హెచ్చరించారు. అయినా అవినీతిపరులు ఉన్న కేబినెట్‌కు వెళ్లి నేనూ జైలు పాలు కావాలా అని ప్రశ్నించారు. తన తాపత్రయం అంతా పార్టీ బలోపేతం కోసమే అన్నారు. తనకు బెదిరింపు కాల్స్ వస్తున్నా వెనుకడుగు వేయకుండా అవినీతికి వ్యతిరేకంగా పోరాటం చేస్తున్నానన్నారు.

Published On December 1, 2011