దాడి చేస్తే ఊరుకోం?: బాబుకు కోదండరామ్ హెచ్చరిక

By Srinivas

Published: Monday, January 2, 2012, 14:52 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుపై తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ సోమవారం తీవ్రస్థాయిలో విరుచుకు పడ్డారు. ఉద్యోగ సంఘ నేతలతో కలిసి కోదండరామ్ హోంమంత్రి సబితా ఇంద్రా రెడ్డిని కలిసి పోలీసుల తీరుపై ఫిర్యాదు చేశారు. అనంతరం ఆయన మీడియాతో మాట్లాడారు. బాబు పర్యటన సందర్భంగా పోలీసులు తెలంగాణవాదుల పట్ల అమానుషంగా ప్రవర్తిస్తున్నారని వారిపై చర్యలు తీసుకోవాలని ఫిర్యాదు చేశామన్నారు. హోంమంత్రి సానుకూలంగా స్పందించారని, పోలీసు అధికారులతో చర్చించి చర్యలు తీసుకుంటామని హామీ ఇచ్చారన్నారు. తెలంగాణలో బాబు పర్యటన ప్రజాస్వామ్య విలువలను కాలరాసే విధంగా ఉందన్నారు. నిరసన వ్యక్తం చేస్తున్న వారిపై టిడిపి నేతలు అమానుషంగా ప్రవర్తిస్తున్నారన్నారు.

తెలంగాణవాదులకు నోటీసులు ఇస్తూ, అక్రమ అరెస్టు చేస్తూ పోలీసులు వేధిస్తున్నారన్నారు. జెఏసి నేతలను ముందస్తుగా అరెస్టు చేసి ఆ తర్వాత అక్రమ కేసులు బనాయిస్తున్నారని విమర్శించారు. సమైక్యవాదంతో చంద్రబాబు తెలంగాణపై దాడి చేస్తే ఊరుకునేది లేదన్నారు. తెలంగాణవాదులపై టిడిపి దాడి చేస్తుందన్నారు. పోలీసులు తెలంగాణలో వివక్ష చూపించడం సరికాదన్నారు. ప్రతి ఒక్కరికీ భావ ప్రకటన ఉంటుందని కానీ అక్కడి ప్రజల ఆకాంక్షను నేతలు గుర్తెరగాలన్నారు. టిడిపి నేతలు చేస్తున్న వివాదాస్పద వ్యాఖ్యలను పోలీసులు పట్టించుకోవడం లేదన్నారు.

Published On January 2, 2012