చంద్రబాబు రావొద్దు: టవరెక్కిన విద్యార్థి, పోరు ఉద్రిక్తత

By Srinivas

Published: Wednesday, January 4, 2012, 14:13 [IST]

వరంగల్: తెలుగుదేశం పార్టీ అధినేత నారా చంద్రబాబు నాయుడు పర్యటనపై రెండు రోజుల ముందే నుండే జిల్లాలో ఉద్రిక్త పరిస్థితి ఏర్పడుతోంది. బాబు పర్యటన దృష్ట్యా పోలీసులు జిల్లా వ్యాప్తంగా ముందస్తు అరెస్టులు చేస్తున్నారు. టిఆర్ఎస్, జెఏసి నేతలను అరెస్టు చేస్తున్నారు. నేతలెవరూ రెచ్చగొట్టే ప్రకటనలు చేయవద్దని పోలీసులు హెచ్చరిస్తున్నారు. బాబు పర్యటన సందర్భంగా జరుగుతున్న అరెస్టులను నిరసిస్తూ టిఆర్ఎస్వీ, జెఏసి ఆధ్వర్యంలో పలువురు విద్యార్థులు సుబేదారి పోలీసు స్టేషన్‌ను ముట్టడించారు. పోలీసులు విద్యార్థులను అదుపులోకి తీసుకున్నారు. పట్టణంలో భారీగా ర్యాపిడ్ యాక్షన్ ఫోర్స్‌ను మోహరించారు. అరెస్టు చేసిన విద్యార్థులను వెంటనే విడుదల చేయాలని నేతలు డిమాండ్ చేశారు.

హన్మకొండ ఆర్ట్స్ కళాశాల వద్ద ఓ విద్యార్థి టవర్ ఎక్కి నిరసన తెలిపాడు. చంద్రబాబు తన పర్యటనను రద్దు చేసుకోవాలని డిమాండ్ చేశారు. తెలంగాణపై స్పష్టమైన వైఖరి ప్రకటించిన తర్వతే తెలంగాణకు రావాలన్నారు. నలుగురు విద్యార్థులు పెట్రోల్ పోసుకోగా లెక్చరర్లు అడ్డుకున్నారు. కాగా అరెస్టులను ఆపాలని తెలంగాణ ప్రజా ఫ్రంట్ చైర్మన్ గద్దర్ సూచించారు. అరెస్టులపై హెచ్చార్సీలో ఫిర్యాదు చేస్తామని వరంగల్ జిల్లా అధ్యక్షుడు పెద్ది సుదర్శన్ రెడ్డి హెచ్చరించారు. కాగా ఈ నెల ఆరవ తేదిన వరంగల్ జిల్లాలో బాబు పర్యటన ఉన్న విషయం తెలిసిందే.

Published On January 4, 2012