బాలయ్య అంటున్న ఫ్యాన్స్, బాబే అంటున్న టిడిపి

హైదరాబాద్: తాను క్రియాశీలక రాజకీయాల్లోకి వస్తానని హీరో బాలకృష్ణ ప్రకటించడం ఆయన అభిమానులను ఆనందంలో ముంచెత్తుతోంది. ఆయన రాజకీయ ఆరంగేట్ర ప్రకటన తెలుగుదేశం పార్టీ క్యాడర్‌లోనూ ఉత్సాహం నింపింది. అదే సమయంలో టిడిపి క్యాడర్‌ను సందిగ్ధంలో పడేసిందనే వాదనలు కూడా వినిపిస్తున్నాయి. తాను రాజకీయాల్లోకి వచ్చినప్పటికీ బావే ముఖ్యమంత్రి అని బాలయ్య గతంలో స్పష్టం చేసినప్పటికీ ఆయన అభిమానులు అతనిని కాబోయే ముఖ్యమంత్రిగా ఊహించుకుంటున్నారు. ఇటీవల హైదరాబాదులో శ్రీరామరాజ్యం యాభై రోజుల వేడుక జరిగిన సమయంలో అభిమానులు పెద్ద ఎత్తున బాలయ్య సిఎం అంటూ నినాదాలు చేశారు. అలాగే ఆయన పర్యటిస్తున్న సమయంలో అభిమానులు కాబోయే సిఎం బాలయ్య అంటూ నినాదాలు చేస్తున్నారు.

అయితే ఈ విషయంపై టిడిపి క్యాడర్ కినుక వహిస్తున్నట్లుగా కనిపిస్తోంది. బాలయ్య రాజకీయ ఆరంగేట్రానికి ముందే అభిమానులు ఆయనను సిఎంగా ఊహించుకోవడం చూస్తుంటే ఆయన పూర్తిస్థాయి రాజకీయాల్లోకి వచ్చాక టిడిపికి తలనొప్పులు తప్పవని రాజకీయ పరిశీలకులు అభిప్రాయపడుతున్నారు. బాలయ్య పర్యటన సందర్భంగా టిడిపి కార్యకర్తలు మాట్లాడుతూ.. బాలయ్య రాజకీయాల్లోకి రావడం తమకు ఉత్సాహంగా ఉందని, టిడిపికి ప్లస్ అవుతుందని అంటూ చంద్రబాబును ముఖ్యమంత్రిని చేయడానికే ఆయన రాజకీయాల్లోకి వస్తున్నారని చెబుతున్నారు. బాలయ్య సిఎం అవుతాడని అభిమానులు, బాబును సిఎం చేయడానికి నందమూరి హీరో వస్తున్నాడని పార్టీ క్యాడర్ చెబుతుండటం విశేషం.

English summary

Hero Nandamuri Balakrishna fans think that he will became cm in future. But TDP cadre saying that Balakrishna entry is for Chandrababu.