ఎమ్మార్ కేసు: ఫ్యామిలీ చరిత్ర తవ్విన కోనేరు ప్రసాద్

By Srinivas

Published: Thursday, January 12, 2012, 12:45 [IST]

హైదరాబాద్: ఎమ్మార్ కేసులో అరెస్టైన కోనేరు ప్రసాద్ గురువారం సిబిఐ ప్రత్యేక న్యాయస్థానం ముందు తన కుటుంబ చరిత్రను ఏకరువు పెట్టారు. చంచల్ గూడ జైలులో ఉన్న కోనేరు ప్రసాద్‌ను కోర్టు ఉదయం వీడియో కాన్ఫరెన్సు ద్వారా విచారించింది. ఈ సందర్భంగా కోనేరు తనకు బెయిల్ ఇవ్వాలని న్యాయమూర్తిని ప్రాదేయపడ్డారు. మూడు తరాలుగా మా కుటుంబంపై ఎటువంటి మచ్చ లేదని చెప్పారు. సంబంధం లేని కేసులో సిబిఐ తనను ఇరికించిందని అన్నారు. తన ఆరోగ్యం కూడా క్షీణించిందని దయచేసి బెయిల్ ఇప్పించండని కోరారు. మూడు దశాబ్దాలుగా తాను వ్యాపారంలో ఉన్నానని, దేశవిదేశాల్లో తనకు వ్యాపారం ఉందన్నారు. తనపై ఎక్కడా ఎలాంటి మచ్చలేదని చెప్పారు.

అనంతరం న్యాయమూర్తి, బెయిల్ విషయం పరిశీలిస్తామని, నీ ఆరోగ్యం ఎలా ఉందని కోనేరును అడిగారు. ఇటీవల ఆయన కొంత అస్వస్థతకు గురయ్యారు. కాగా ఇరువర్గాల వాదనలు విన్న కోర్టు కోనేరు రిమాండ్‌ను 25 వరకు పొడిగించింది. ఎమ్మార్ కేసులో కోనేరు రంగారావు ఇటీవల అరెస్టైన విషయం తెలిసిందే.

Published On January 12, 2012