చిరంజీవికి బాలకృష్ణ ఎందులోనూ పోటీ కాదు: ఆనం

By Srinivas

Published: Thursday, January 12, 2012, 16:21 [IST]

నెల్లూరు: తిరుపతి శాసనసభ్యుడు, తమ పార్టీ నేత చిరంజీవికి నందమూరి హీరో బాలకృష్ణ ఎందులోనూ పోటీ కాదని శ్రీ పొట్టి శ్రీరాములు నెల్లూరు జిల్లా శాసనసభ్యుడు ఆనం వివేకానంద రెడ్డి గురువారం అన్నారు. చిరుకు బాలయ్య అటు సినిమాల్లో, ఇటు రాజకీయాల్లోనూ పోటీయే కాదన్నారు. కష్టపడి పైకి వచ్చిన వ్యక్తి చిరంజీవి అయితే అదృష్టం ద్వారా వచ్చిన వ్యక్తి బాలకృష్ణ అన్నారు. తెలుగుదేశం పార్టీ అధినేత నారా చంద్రబాబు నాయుడు బాలయ్యను చదరంగంలో సిపాయిలా వాడుకుంటున్నారని ఆరోపించారు. హరికృష్ణ, జూనియర్ ఎన్టీఆర్‌లకు చెక్ చెప్పేందుకే చంద్రబాబు బాలయ్యను తెరపైకి తీసుకు వచ్చారన్నారు. మామ ఎన్టీఆర్‌కే వెన్నుపోటు పొడిచిన బాబుకు బాలయ్యను పక్కన పెట్టడం పెద్ద పనేం కాదన్నారు.

కాగా ఇటీవల విజయవాడ పర్యటనలో బాలయ్య సామాజిక న్యాయం పేరుతో వచ్చిన వారు ప్రజలకు చేసిందేమీ లేదని చిరంజీవిని ఉద్దేశించి అన్నారు. అందుకు చిరంజీవి విశాఖపట్నంలో స్పందించారు. బాలయ్య తనకు మంచి స్నేహితుడు అని, ఆయనది చిన్నపిల్లాడి మనస్తత్వమని, తనపై చేసిన వ్యాఖ్యలు పట్టించుకోవాల్సిన అవసరం లేదని కామెంట్ చేశారు. కాంగ్రెసులో ఉన్న చిరుకు బాలయ్యే గట్టి పోటీ అని టిడిపి భావిస్తుండగా, అంత సీన్ లేదని కాంగ్రెసు అంటోంది.

Published On January 12, 2012