చిరు నేతల ప్రమాణ స్వీకారం: నాగబాబు, అల్లు హాజరు

By Srinivas

Published: Thursday, January 19, 2012, 12:00 [IST]

హైదరాబాద్: తిరుపతి శాసనసభ్యుడు చిరంజీవి వర్గం నేతలు సి.రామచంద్రయ్య(సిఆర్), గంటా శ్రీనివాస రావు గురువారం ఉదయం గం.11.43 నిమిషాలకు మంత్రులుగా ప్రమాణ స్వీకారం చేశారు. వారు తెలుగులో దైవసాక్షిగా ప్రమాణం చేశారు. 11.43 నిమిషాలకు ప్రారంభమైన ప్రమాణ స్వీకారోత్సవం 11.50 నిమిషాలకు పూర్తయింది. గవర్నర్ నరసింహన్ వారితో ప్రమాణం చేయించారు. అనంతరం సిఆర్, గంటాలకు సిఎం, పిసిసి చీఫ్, గవర్నర్ అభినందనలు తెలిపారు. ప్రజారాజ్యం పార్టీ కాంగ్రెసులో విలీనమైన తర్వాత చాలారోజులకు చిరంజీవి వర్గం నేతలకు పదవులు దక్కడంతో ఆయన వర్గంలో ఉత్సాహం కనిపించింది. గంటా అనకాపల్లి నుండి ప్రాతినిథ్యం వహిస్తుండగా, రామచంద్రయ్య పిఆర్పీ విలీనం తర్వాత ఎమ్మెల్సీగా ఎన్నికయ్యారు.

ప్రమాణ స్వీకారోత్సవ కార్యక్రమానికి చిరంజీవి, ముఖ్యమంత్రి కిరణ్ కుమార్ రెడ్డి, పిసిసి చీఫ్ బొత్స సత్యనారాయణ, మండలి చైర్మన్ చక్రపాణి, డిప్యూటీ సిఎం దామోదర రాజనర్సింహ, చిరు సోదరుడు నాగబాబు, నిర్మాత అల్లు అరవింద్, మంత్రులు సబితా ఇంద్రా రెడ్డి, డికె అరుణ, సునితా లక్ష్మా రెడ్డి, దానం నాగేందర్, ముఖేష్ గౌడ్ తదితరులు హాజరయ్యారు. గంటా, సిఆర్‌ల స్వంత జిల్లాల నుండి భారీగా ప్రజారాజ్యం పార్టీ కార్యకర్తలు తరలి వచ్చారు. అయితే రాజ్‌భవన్‌లోకి వెళ్లేందుకు పరిమిత పాసులు మాత్రమే ఉండటంతో అందరికీ లోపలకు వెళ్లేందుకు అవకాశం దక్కలేదు. దీంతో జిల్లాల నుండి వచ్చిన పిఆర్పీ క్యాడర్‌ నిరాశకు లోనయింది. తమిళనాడు గవర్నర్ రోశయ్య మంత్రులుగా ప్రమాణ స్వీకారం చేసిన వారిని ఫోన్‌లో అభినందించారు.

Published On January 19, 2012