స్టార్ వార్: బాలయ్య, చిరంజీవి ఓట్లు రాలుస్తారా?

హైదరాబాద్: రాష్ట్ర రాజకీయాల్లో స్టార్ వార్ ప్రారంభమైంది. సినీ రంగంలో ఢీకొంటూ వచ్చిన ఇద్దరు మెగా హీరోలు రాజకీయ రంగంలో ఒకరిపై మరొకరు పైచేయి సాధించడానికి ప్రయత్నాలు ప్రారంభించారు. బాలకృష్ణ, చిరంజీవి పరస్పరం మాటల తూటాలు విసురుకుంటున్నారు. దీంతో రాష్ట్ర రాజకీయాలు వేడెక్కాయి. ఇద్దరికి కూడా మంచి ఫ్యాన్ ఫాలోయింగ్ ఉంది. హీరోలు సైగ చేస్తే చాలు, అభిమానులు పరస్పరం తలపడడానికి సిద్ధపడుతారు. ఈ స్టార్ హీరోలు తమ తమ పార్టీలకు ఓట్లను రాబడుతారా అనేది ఇప్పుడు చర్చనీయాంశంగా మారింది. ఇరువురి సభలు, కార్యక్రమాలు కూడా రాష్ట్రంలో ఎక్కడైనా హోరెత్తుతాయి. కానీ ఓట్లను రాబట్టుకోవాల్సి వచ్చే సరికి వారికి ఉన్న యంత్రాంగమేమిటనేది ప్రశ్న.

గత ఎన్నికల్లో ప్రజారాజ్యం పార్టీ పెట్టి పోటీ చేసిన చిరంజీవి అధికారానికి ఏ మాత్రం చేరువ కాలేకపోయారు. కేవలం 18 శాసనసభా నియోజకవర్గాల్లో విజయం సాధించి సరిపెట్టుకోవాల్సి వచ్చింది. తెలుగుదేశం పార్టీ కోసం బాలకృష్ణనే కాకుండా జూనియర్ ఎన్టీఆర్ కూడా చెమటోడ్చి ప్రచారాలు సాగించారు. కాంగ్రెసు పార్టీపైనే కాకుండా చిరంజీవిపైనా వారు మాటల కత్తులు దూశారు. కానీ ఫలితం కనిపించలేదు. సభలను హీరోలు అదరగొట్టారు. కానీ ఓట్లను మాత్రం తెలుగుదేశం అనుకూలంగా తేలేకపోయారు. తెలుగుదేశం పార్టీ ప్రతిపక్షంతోనే సరిపెట్టుకోవాల్సి వచ్చింది.

తాజాగా, కాంగ్రెసు తరఫున చిరంజీవి, తెలుగుదేశం పార్టీకి బాలయ్య స్టార్ కాంపైనర్లు అవుతారనేది ప్రస్తుత వాతావరణాన్ని బట్టి అర్థం చేసుకోవచ్చు. ఆ పార్టీల నాయకత్వాలు కూడా వీరి ద్వారా ప్రజలను ఆకట్టుకోవచ్చునని నమ్ముతున్నాయి. ఏమైనా, ఉప ఎన్నికలు ఈ ఇద్దరు హీరోలకు కూడా పరీక్షనే. రానున్న ఉప ఎన్నికల్లో వీరి చరిష్మా ఏ మేరకు పండుతుందనేది తేలిపోతుంది.

English summary

Star war in AP politics has beganm as Chiranjeevi and Balakrishna are throwing words lije knives at each other.