చిరంజీవిపై పోటీ చేయ్: బాలకృష్ణకు ఎమ్మెల్యేల సవాల్

విశాఖపట్నం: హీరో నందమూరి బాలకృష్ణకు దమ్ముంటే తమ నేత, తిరుపతి శాసనసభ్యుడు చిరంజీవిపై పోటీ చేయాలని కాంగ్రెసు, పిఆర్పీ పార్టీల శాసనసభ్యులు మంగళవారం విశాఖపట్నంలో సవాల్ విసిరారు. జిల్లాకు చెందిన ఎమ్మెల్యేలు పంచకర్ల రమేష్ బాబు, ద్రోణంరాజు శ్రీనివాస్, చింతలపూడి వెంకట్రామయ్య, శ్రీనివాస్‌లు బాలయ్యపై ఫైర్ అయ్యారు. చిరంజీవిని విమర్శించే అర్హత బాలయ్యకు లేదన్నారు. రాజకీయాల్లో సామాజిక న్యాయం పాటించిన ఘనత చిరంజీవిదేనన్నారు. ఆడియో ఫంక్షన్‌లలో, సినిమా వంద రోజుల విజయోత్సవ ఫంక్షన్‌లలో మాట్లాడినట్టు బాలయ్య మాట్లాడుతున్నారన్నారు. అంతేగానీ ఆయన రాజకీయ అవగాహనతో మాట్లాడినట్లుగా కనిపించడం లేదన్నారు. బాలయ్య రెండో కోణం అంతా నేరమయమే అన్నారు. జైల్లో ఉండాల్సిన వ్యక్తి బయట తిరుగుతున్నారన్నారు.

కాగా ఇటీవల బాలకృష్ణ, చిరంజీవిల మధ్య మాటల యుద్ధం నడుస్తున్న విషయం తెలిసిందే. సామాజిక న్యాయం పేరుతో పార్టీని స్థాపించిన వారు ఆ తర్వాత ఆ పార్టీని కాంగ్రెసుకు అమ్ముకున్నారని, తనను ఎవరో చిన్న పిల్లవాడు అన్నారని అతను తనను ఒకవైపే చూశాడని రెండోవైపు చూడలేదని చిరంజీవిని ఉద్దేశించి బాలయ్య వ్యాఖ్యానించిన విషయం తెలిసిందే.

English summary

Vishakapatnam Congress and PRP mlas challenged hero Balakrishna to contest on Tirupati MLA Chiranjeevi.