అక్కను వేధించి చంపిన ప్రియుడిపై తమ్ముడి ప్రతీకారం

ఖమ్మం: తన సోదరి హత్యకు ఓ తమ్ముడు గురువారం ప్రతీకారం తీర్చుకున్న సంఘటన ఖమ్మం జిల్లా ఇల్లెందులో చోటు చేసుకుంది. తొమ్మిది నెలల క్రితం తన సోదరిని హత్య చేసిన శ్రీనివాస్ అనే యువకుడిపై హతురాలి తమ్ముడు కత్తితో దాడి చేసి యాసిడ్ పోసి చంపేందుకు ప్రయత్నించాడు. శ్రీనివాస్ ఇల్లెందు క్రాస్ రోడ్డులో గురువారం ఉదయం ఏదో పనిపై నిలబడినాడు. అంతలో హతురాలి తమ్ముడు వచ్చి అతని కడుపులో కత్తితో పొడిచాడు. అనంతరం తనతో తెచ్చుకున్న యాసిడ్‌ను పొడిచిన ప్రాంతంలో పోశాడు. అయితే పక్కనే పోలీసు స్టేషన్ ఉండటంతో గమనించిన పోలీసులు సంఘటన స్థలానికి వచ్చి శ్రీనివాస్ ను దగ్గరలోని ప్రభుత్వ ఆసుపత్రికి తరలించారు. ఆతని పరిస్థితి విషమంగా ఉంది. శ్రీనివాస్ పైన దాడి చేసిన వ్యక్తి వయస్సు పదహారేళ్లు ఉంటుంది.

శ్రీలత అనే అమ్మాయిని శ్రీనివాస్ తొమ్మిది నెలల క్రితం ప్రేమ, పెళ్లి పేరుతో వేధించి ఆ తర్వాత హత్య చేశాడు. ఇల్లెందు మున్సిపాలిటీ ఎదుటనే శ్రీలతను శ్రీనివాస్ దారుణంగా గొంతు కోసి చంపాడు. ఆ తర్వాత శ్రీనివాస్ జైలుకు వెళ్లాడు. మూడు నెలల క్రితం బెయిల్ పైన విడదలయి బయటకు వచ్చాడు. అయితే తన అక్క శ్రీలత హత్యను చూసిన సోదరుడు అప్పటి నుండి పగబట్టి శ్రీనివాస్ ను చంపేందుకు ప్రయత్నాలు చేస్తున్నట్టుగా తెలుస్తోంది. శ్రీనివాస్ కదలికలు ఎప్పటికప్పుడు గమనించి గురువారం అతనిపై దాడి చేశాడు.

English summary

Victim's brother attacked with acid on accused Srinivas today in Khammam district.