కెసిఆర్‌పై ద్వేషం లేదు, కానీ నాటకాలొద్దు: మోత్కుపల్లి

By Srinivas

Published: Tuesday, March 6, 2012, 10:39 [IST]

హైదరాబాద్: తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావుపై తనకు వ్యక్తిగత ద్వేషం లేదని తెలుగుదేశం పార్టీ సీనియర్ శాసనసభ్యుడు మోత్కుపల్లి నర్సింహులు మంగళవారం అన్నారు. కెసిఆర్ వైఖరిని వ్యతిరేకిస్తూ మోత్కుపల్లి ఉదయం తన ఇంటి నుండి అసెంబ్లీ వరకు పాదయాత్ర నిర్వహించారు. ఈ సందర్భంగా ఆయన మాట్లాడారు. కెసిఆర్ పైన తనకు వ్యక్తిగత ద్వేషం లేదని చెప్పారు. అయితే తెలంగాణ సెంటిమెంటును ఉపయోగించుకొని ఆయన తెలంగాణ ప్రజలను మోసం చేస్తున్నారని విమర్శించారు. పదకొండేళ్లుగా కెసిఆర్ నాటకాలు ఆడుతున్నారని విమర్శించారు. ప్రధానమంత్రి మన్మోహన్ సింగ్‌తో తెలంగాణ రాదని చెప్పించి వ్యక్తి కెసిఆర్ అని విమర్శించారు. కెసిఆర్ ఓట్లు, నోట్ల కోసమే తెలంగాణను ఉపయోగించుకుంటున్నారన్నారు.

ఉప ఎన్నికల్లో టిఆర్ఎస్ కు ఓటేస్తే వ్యాపారానికి లైసెన్స్ ఇచ్చినట్లేనన్నారు. తన పాదయాత్రకు, ఉప ఎన్నికలకు సంబంధం లేదన్నారు. తెలుగుదేశం పార్టీ అధికారంలోకి వచ్చాక అమరవీరుల కుటుంబాలలో ఒకరికి ఉద్యోగం ఇస్తామని చెప్పారు. తన పాదయాత్రలో కెసిఆర్ అవినీతి, అక్రమాలను బయట పెడతానని అన్నారు. కాగా తెలంగాణ రాష్ట్ర సమితి చచ్చిపోయిన పార్టీ అని దానిని ఇంకా చంపాల్సిన పని లేదని మరో నేత రేవంత్ రెడ్డి విమర్శించారు.

Published On March 6, 2012