యుపిలో మాయావతి ఔట్, ఉత్తరాఖండ్‌లో కింగ్ మేకర్?

డెహ్రాడూన్: ఉత్తర ప్రదేశ్‌లో అధికారం కోల్పోతున్న ముఖ్యమంత్రి మాయావతి నాయకత్వంలోని బహుజన్ సమాజ్ పార్టీ ఉత్తరాఖండ్‌లో కింగ్ మేకర్ అయ్యే అవకాశాలు కనిపిస్తున్నాయి. ఉత్తరాఖండ్ లోని 70 స్థానాల్లో అధికార భారతీయ జనతా పార్టీ, కాంగ్రెసులు హోరా హోరీగా ఉన్నాయి. కడపటి సమాచారం అందే సమయానికి బిజెపి 24 స్థానాలలో గెలుపొంది 9 స్థానాలలో ముందంజలో ఉంది. కాంగ్రెసు 20 స్థానాలలో గెలుపొంది తొమ్మిది స్థానాలలో ముందంజలో ఉంది. ఇతరులు రెండు స్థానాల్లో గెలుపొందారు. ప్రభుత్వాన్ని ఏర్పాటు చేయాలంటే ఏ పార్టీ అయిన 36 సీట్లు గెలుపొందాలి. కానీ కాంగ్రెసు, బిజెపి రెండు పార్టీలు అన్ని స్థానాలు గెలుపొందే అవకాశాలు కనిపించడం లేదు. ఇక మాయావతి ఆధ్వర్యంలోని బిఎస్పీ అక్కడ ఇప్పటికే మూడు స్థానాలలో గెలుపొందింది. ఒక స్థానంలో ముందంజలో ఉంది. దీంతో ఆమె పార్టీ అక్కడ కింగ్ మేకర్ అయ్యే అవకాశాలు కనిపిస్తున్నాయి.

2007 ఎన్నికల కంటే ప్రస్తుత ఎన్నికల్లో బిఎస్పీ తక్కువ సీట్లనే గెలుచుకునే అవకాశాలు కనిపిస్తున్నాయి. 2007లో 8 సీట్లలో గెలిచిన బిఎస్పీ ఇప్పుడు నాలుగు సీట్లలో మాత్రమే గెలుపొందే అవకాశముంది. అయినప్పటికీ బిజెపి, కాంగ్రెసులలో ఏ పార్టీకి సాధారణ మెజార్టీ రాకపోవడం, ఆ మెజార్టీకి ఇరు పార్టీలు దరిదాపుల్లో ఉన్న నేపథ్యంలో బిఎస్పీయే కీలకం కానుందని అంటున్నారు.

English summary

Assembly elections results 2012, Early trends show lead for BJP and SP in UP, Congress in Punjab.