నారా లోకేష్ ఎంట్రీపై ఆచితూచి చంద్రబాబు వ్యాఖ్య

By Pratap

Published: Wednesday, March 7, 2012, 11:34 [IST]

హైదరాబాద్: తన కుమారుడు నారా లోకేష్ రాజకీయ ఎంట్రీపై తెలుగుదేశం పార్టీ అధ్యక్షుడు నారా చంద్రబాబు నాయుడు ఆచితూచి వ్యాఖ్యానించారు. ఉత్తరప్రదేశ్ రాజకీయాల్లో సమాజ్‌వాదీ పార్టీ అధినేత ములాయం సింగ్ యాదవ్ కుమారుడు అఖిలేష్ యాదవ్ లాగా రాష్ట్రంలో లోకేష్ వస్తారా అని మీడియా ప్రతినిధులు అడిగితే మీరే అంటున్నారా, మరెవరైనా అన్నారా అంటూ నవ్వుతూ తొలుత చంద్రబాబు వెళ్లిపోయారు. ఆ తర్వాత అదే ప్రశ్న వచ్చినప్పుడు - లోకేష్ రాజకీయ ఎంట్రీపై లోతుగా విశ్లేషణ జరగాల్సి ఉందని ఆయన అన్నారు. దీన్ని బట్టి నారా లోకేష్‌ను రాజకీయ ఆరంగేట్రం చేయించే విషయంపై చంద్రబాబు తీవ్రంగానే ఆలోచిస్తున్నారని అంటున్నారు.

నిజానికి, ఇది వరకే నారా లోకేష్‌కు రాజకీయ ప్రవేశానికి చంద్రబాబు పచ్చజెండా ఊపారు. అయితే, జూనియర్ ఎన్టీఆర్‌ను అడ్డుపెట్టి తన బావమరిది, రాజ్యసభ సభ్యుడు నందమూరి హరికృష్ణ అసంతృప్తి బావుటా ఎగురేయడంతో ఆయన వెనక్కి తగ్గారు. నారా లోకేష్ రాజకీయ రంగ ప్రవేశానికి నందమూరి కుటుంబ సభ్యుల నుంచి ఏ విధమైన వ్యతిరేకత రాకుండా చూసుకోవాలనేది చంద్రబాబు ఆలోచనగా కనిపిస్తోంది. అందుకు అనుగుణంగా ఆయన పావులు కదిపేందుకు సిద్ధపడినట్లు చెబుతున్నారు.

తనకు వియ్యంకుడైన బాలకృష్ణను హరికృష్ణకు, జూనియర్ ఎన్టీఆర్‌కు అడ్డం పెట్టి నారా లోకేష్‌కు లైన్ క్లియర్ చేయాలనేది చంద్రబాబు యోచనగా చెబుతున్నారు. బాలకృష్ణ పిల్లనిచ్చిన మామ కావడంతో లోకేష్‌ ఎంట్రీకి ఆటంకం కలిగించరని ఆయన అనుకుంటున్నట్లు చెబుతున్నారు. ఏమైనా, నారా లోకేష్ రాజకీయ ప్రవేశంపై మాత్రం పార్టీలో కూడా తీవ్రంగానే ఆలోచన సాగుతూనే ఉన్నట్లు సమాచారం.

Published On March 7, 2012