రాహుల్, సోనియాలపై జగన్ వ్యాఖ్యలు నిజమేనా?

హైదరాబాద్: ఉత్తర ప్రదేశ్ ఉప ఎన్నికల్లో ఏఐసిసి ప్రధాన కార్యదర్శి రాహుల్ గాంధీ, ప్రియాంక గాంధీ ప్రచార మంత్రం పని చేయక పోవడంతో వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఏఐసిసి అధ్యక్షురాలు సోనియా గాంధీ పైన, ఆమె కుటుంబం పైన చేసిన వ్యాఖ్యలు నిజమని నిరూపిస్తున్నాయని ఆ పార్టీ అంటోంది. మన రాష్ట్రంలో 2004లో, 2009లో జరిగిన సాధారణ ఎన్నికల్లో కాంగ్రెసు పార్టీ అధికారంలోకి రావడానికి కారణం తన తండ్రి, దివంగత ముఖ్యమంత్రి వైయస్ రాజశేఖర రెడ్డి కష్టార్జితమేనని జగన్ అంటూ వస్తున్నారు. సోనియా గాంధీ లేదా ఆయన కుటుంబం వల్ల రాష్ట్రంలో కాంగ్రెసు అధికారంలోకి రాలేదని ఆయన తన యాత్రలలో విమర్శిస్తున్నారు. అంతేకాదు కేంద్రంలోనూ యుపిఏ ప్రభుత్వం తన తండ్రి పెట్టిన భిక్షేనంటూ సోనియాపై తీవ్రస్థాయిలో ధ్వజమెత్తారు. వైయస్ పాదయాత్ర చేయకుంటే 2004లో కాంగ్రెసు అధికారంలోకి రాకపోయి ఉండేదన్నారు. ఆ తర్వాత ఐదేళ్లలో తన తండ్రి ప్రవేశ పెట్టిన పలు సంక్షేమ పథకాల కారణంగా ప్రజలు వైయస్‌ను చూసి 2009లో కాంగ్రెసును గెలిపించారని, కానీ సోనియా గాంధీని చూసి కాదని అంటున్నారు.

ఆయన వ్యాఖ్యలపై కాంగ్రెసు నేతలు మండిపడ్డారు. రాష్ట్రంలో పార్టీ అధికారంలోకి రావడానికి, కేంద్రంలో యుపిఏ ప్రభుత్వం రావడానికి సోనియా గాంధీయే కారణమని జగన్‌కు కౌంటర్ వేశారు. సోనియా వల్లనే వైయస్ ఎదిగారని ఎదురుదాడి చేశారు. రాష్ట్రంలో సోనియా గాంధీ కారణంగానే కాంగ్రెసు గెలిచి ఉంటే ప్రభుత్వాన్ని రద్దు చేసి ఎన్నికలకు సిద్ధపడాలని జగన్, ఆయన వర్గం సవాల్ విసిరింది. అయితే గతంలో జరిగిన బీహార్ ఎన్నికల నుండి మొదలు ఇప్పటి ఉత్తర ప్రదేశ్ ఎన్నికల వరకు సోనియా కుటుంబం మాయాజాలం ఏమాత్రం పని చేయలేదు. తాజాగా సోనియా, రాహుల్ సొంత పార్లమెంటు నియోజకవర్గాల్లో పది అసెంబ్లీ సీట్లలో ఎనిమిదింటిలో దారుణంగా కాంగ్రెసు ఓడిపోయింది. సోనియా కుటుంబం మానియా ఉత్తర భారతదేశంలోనే పని చేయలేదని అలాంటిది ఇక్కడ పని చేసిందని ఎలా చెబుతారని వైయస్సార్ కాంగ్రెసు పార్టీ ప్రశ్నిస్తోంది.

English summary

YSR Congress Party saying that party chief YS Jaganmohan Reddy comments on AICC president Sonia Gandhi are true.