నాకు తెలియదు, తెలిస్తే...: డిఎల్ రాజీనామాపై బొత్స

By Srinivas

Published: Sunday, March 25, 2012, 11:47 [IST]

హైదరాబాద్: మంత్రి డిఎల్ రవీంద్రా రెడ్డి రాజీనామా చేసిన విషయం తనకు తెలియదని ప్రదేశ్ కాంగ్రెసు కమిటీ అధ్యక్షుడు, రవాణా శాఖ మంత్రి బొత్స సత్యనారాయణ శనివారం అన్నారు. ఆయన విజయనగరం జిల్లాలో విలేకరులతో మాట్లాడారు. డిఎల్ రాజీనామా విషయం తనకు తెలియదని, తెలిస్తే ఆయనతో నేరుగా మాట్లాడతానని చెప్పారు. నా దృష్టికి రానివ్వండి అని అన్నారు. ఇటీవల జరిగిన ఏడు నియోజకవర్గాల ఉప ఎన్నికల్లో పార్టీ ఓటమికి పలు కారణాలు ఉన్నాయని అన్నారు. ఓటమికి కారణాలపై పార్టీ సమీక్షిస్తుందని, రాబోయే ఉప ఎన్నికలకు సంబంధించి ఇప్పటికే అభ్యర్థుల ఎంపిక కసరత్తు పూర్తయిందని చెప్పారు.

సగం మంది అభ్యర్థులను కూడా గుర్తించామని చెప్పారు. ఫలితాలు ఆశాజనకంగా ఉంటాయని భావిస్తున్నట్లు చెప్పారు. తమది కుటుంబ, ప్రాంతీయ పార్టీ కాదని, జాదీయ పార్టీ అని అన్నారు. ఓ విధానం ప్రకారం తాము నడుచుకుంటామని చెప్పారు. మాజీ మంత్రి శంకర రావు వ్యాఖ్యలపై పార్టీ ఫోరంలోనే మాట్లాడతామని చెప్పారు.

Published On March 25, 2012