విషాదం: సరూర్‌నగర్ చెరువులో ఆరు మృతదేహాలు

By Srinivas

Published: Wednesday, April 18, 2012, 11:59 [IST]

హైదరాబాద్: రాజధానిలో విషాదం వెలుగు చూసింది. బుధవారం ఉదయం హైదరాబాదులోని సరూర్ నగర్‌లో ఆరు మృతదేహాలు నీటిలో తేలాయి.విషయం తెలుసుకున్న పోలీసులు వెంటనే సంఘటనా స్థలానికి చేరుకున్నారు. మృతి చెందిన వారు అందరూ ఆడవారే అని తెలుస్తోంది. వారిలో ముగ్గురికి ముప్పై నుండి నలభై ఏళ్ల వయస్సు ఉండగా, మరో ముగ్గురికి ఏడు నుండి పదేళ్ల వయస్సు ఉంటుందని భావిస్తున్నారు.

వారి మృతదేహాలు సరూర్ నగర్ చెరువులో తేలాయి. శవాలు పూర్తిగా ఉబ్బిపోయి ఉన్నాయి. దీంతో మూడు రోజుల క్రితమే వీరు ఆత్మహత్య చేసుకున్నట్లుగా పోలీసులు అనుమానిస్తున్నారు. వీరంతా ఒకే కుటుంబానికి చెందిన వారిగా భావిస్తున్నారు. ఆరుగురిది ఆత్మహత్యగా భావిస్తున్నప్పటికీ హత్య కోణంలోనూ పోలీసులు విచారిస్తున్నారు.

మృతదేహాల కాళ్లు, చేతులు ప్లాస్టిక్ తాడుతో కట్టి ఉంది. దీంతో హత్య కోణంలోనూ దర్యాఫ్తు చేస్తున్నారు. సరూర్ నగర్ చెరువులో మృతదేహాల విషయం తెలుసుకున్న చుట్టుపక్కల ప్రజలు అక్కడకు భారీగా తరలి వచ్చారు. వారెవరూ స్థానికులు కాదని తెలుస్తోంది. వారిని స్థానికులుగా ఎవరూ చెప్పడం లేదని తెలుస్తోంది.

దీంతో ఇతర ప్రాంతం నుండి వచ్చిన వారు కాళ్లు, చేతులు కట్టుకొని చెరువులో దూకి ఆత్మహత్య చేసుకొని ఉంటారని లేదా వేరే ప్రాంతం నుండి ఎవరైనా తీసుకు వచ్చి చెరువులో పడేసి ఉంటారనే అనుమానాలు వ్యక్తమవుతున్నాయి. ఈ రోజు ఉదయం సైబరాబాద్ కమిషనరేట్ కంట్రోల్ రూంకి చెరువులో మృతదేహాలు ఉన్నాయని ఫోన్ వచ్చిందని స్థానిక పోలీసులు చెబుతున్నారు.

ఇప్పటి వరకు స్థానికులు ఎవరూ దీనిపై స్పందించలేదని, దర్యాఫ్తు తర్వాత అవి ఎవరి మృతదేహాలో తేలుతుందని చెప్పారు. వారి వస్త్రధారణను బట్టి దిగువస్థాయి కుటుంబానికి చెందిన నేతలుగా భావిస్తున్నారు. వారు వేసుకున్న బట్టల ద్వారా ఎవరో తేలుతుందని పోలీసులు చెబుతున్నారు. ప్లాస్టిక్ తాడుతో కట్టి ఉండటం అనుమానాలకు తావిస్తోందంటున్నారు.

Published On April 18, 2012