ట్విస్ట్: ఎయిర్ హోస్టెస్ గీతికను బెదిరించిన కందా 'భార్య'

న్యూఢిల్లీ: మాజీ ఎయిర్ హోస్టెస్ గీతికా శర్మ ఆత్మహత్య కేసు మలుపుల మీద మలుపులు తిరుగుతోంది. ఢిల్లీ పోలీసులకు లభించిన పాత రికార్డులు కొత్త విషయాలను వెల్లడిస్తున్నాయి. గీతికా శర్మ ఆపార్ట్‌మెంట్‌లోకి దూసుకెళ్లి, తాను గీతికను బెదిరించినట్లు అంకితా సింగ్ అంగీకరించింది.

కందాతో తనకు వివాహం జరిగిందని, తమకు ఓ పాప కూడా ఉందని అంకిత చెప్పుకుంది. అంకితపై గీతికా శర్మ 2009లో కేసు పెట్టింది. ఈ సమయంలో పోలీసులు అంకితను గోవాలోని పానాజీ పోలీసులు విచారించారు. ఈ విచారణలో ఆమె ఆ విషయాన్ని అంగీకరించినట్లు బయటపడింది.

పానాజీ పోలీసుల వద్ద ఉన్న రికార్డులను ఢిల్లీ పోలీసులు పరిశీలించారు. పానాజీలోని దోనా పౌలా ప్రాంతంలో ఉన్న గీతిక ఫ్లాట్‌లోకి అంకితా సింగ్ దూసుకెళ్లి ల్యాప్‌టాప్, మొబైల్ ఫోన్ తీసుకుని వెళ్లినట్లు ఆ రికార్డులను పరిశీలించిన ఢిల్లీ పోలీసులు గుర్తించారు. కందాకు చెందిన గోవాలోని కాసినోలో ఉద్యోగం మానేయాలని కూడా తాను గీతికను బెదిరించినట్లు అంకిత పానాజీ పోలీసుల వద్ద అంగీకరించింది.

కందాకు అంకిత అనే పేరు గల మహిళతో అక్రమ సంబంధం ఉందని, వారికి ఓ పాప కూడా పుట్టిందని గీతిక తన సూసైడ్ నోట్‌లో రాసింది. అంకిత ఆచూకీ కోసం ఢిల్లీ పోలీసులు గాలింపు చర్యలు చేపట్టారు. కానీ ఫలితం కనిపించలేదు. ఆమె సింగపూర్‌లో స్థిరపడినట్లు సమాచారం.

గీతిక కుటుంబ సభ్యులు అంకితపై కూడా ఆరోపణలు చేశారని, తాము అంకితను కూడా ప్రశ్నిస్తామని ఢిల్లీ పోలీసులు అంటున్నారు.

English summary

One after another twists in Geetika Sharma suicide case shocked all. In a latest development in the case, Delhi police found some old records in which Ankita Singh had admitted that she indeed had trespassed into Geetika's apartment and threatened her.