పవన్ కల్యాణ్ సినిమాకు తెలంగాణ సెగ: ఫ్లెక్సీ ధ్వంసం

By Srinivas

Updated: Friday, October 19, 2012, 11:21 [IST]

Telanganites burns Pawan Kalyan cinema flexies

వరంగల్: పవర్ స్టార్ పవన్ కల్యాణ్‌కి తెలంగాణ సెగ తగిలింది. గురువారం తమ పార్టీ అధ్యక్షుడు నారా చంద్రబాబు నాయుడుకు వ్యతిరేకంగా ఉందని తెలుగు తమ్ముళ్లు పవన్ కల్యాణ్ సినిమా ఫ్లెక్సీలు, పోస్టర్లు ధ్వంసం చేసిన విషయం తెలిసిందే. శుక్రవారం దానికి తెలంగాణ సెగ కూడా తగిలింది. పవన్ హీరోగా నటించిన చిత్రం కెమెరామెన్ గంగతో రాంబాబు చిత్రంలో తెలంగాణకు వ్యతిరేకంగా ఉందని ఆరోపిస్తూ వరంగల్ జిల్లాలో తెలంగాణవాదులు ఆ సినిమా ఫ్లెక్సీని దగ్ధం చేశారు.

ప్రత్యేక తెలంగాణకు అనుకూలంగా, సినిమాకు, పవన్ కల్యాణ్‌కి వ్యతిరేకంగా నినాదాలు చేస్తూ థియేటర్ ఎదుట ఆందోళనకు దిగారు. తెలంగాణ ప్రాంతంలో కెమెరామెన్ గంగతో రాంబాబు సినిమా ప్రదర్శనను అడ్డుకుంటామని వారు హెచ్చరించారు. కాగా పవర్ స్టార్ పవన్ కళ్యాణ్ హీరోగా నటించిన కెమెరామేన్‌ గంగతో రాంబాబు సినిమా రాజకీయ రంగు పులుముకన్న విషయం తెలిసిందే. తెలుగుదేశం పార్టీ కార్యకర్తలు సినిమాపై నిప్పులు చెరుగుతున్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు కర్నూలు జిల్లా వస్తున్నా.. మీకోసం పాదయాత్రలో పవన్ కళ్యాణ్ సినిమాపై పార్టీ కార్యకర్తలు తమ ప్రతాపాన్ని ప్రదర్శించారు.

పవన్ కళ్యాణ్ ఫ్లెక్సీలను, కెమెరామేన్ గంగతో రాంబాబు పోస్టర్లను తెలుగుదేశం పార్టీ కార్యకర్తలు చించేసి, వాటిని దగ్ధం చేశారు. తమ నాయకుడు చంద్రబాబు పాదయాత్రపై సినిమాలో సెటైర్లు ఉన్నాయని, ఉద్దేశ్యపూర్వకంగానే అందులో ఆ సంభాషణలు పెట్టారని వారు ఆగ్రహం వ్యక్తం చేశారు. సినిమాలోని పాత్రల పేర్లు కూడా చంద్రబాబు కుటుంబ సభ్యుల పేర్లను పోలి ఉన్నాయని వారన్నారు. సినిమాలోని సెటైర్లను తొలగించకపోతే కెమెరామేన్ గంగతో రాంబాబు సినిమాను అడ్డుకుంటామని వారు హెచ్చరించారు.

పాత్రల పేర్లు జవహర్ నాయుడు, రానా బాబు వంటివి ఉండడం పట్ల తెలుగుదేశం పార్టీ కార్యకర్తలు నిరసన వ్యక్తం చేస్తున్నారు. పవన్ కళ్యాణ్ హీరోగా నటించిన కెమెరామేన్ గంగతో రాంబాబు సినిమా గురువారం విడుదలైన విషయం తెలిసిందే. సినిమాలో సెటైర్లు దండిగా ఉన్నాయి. రాజకీయాలపైనే ఈ సెటైర్లను గురి పెట్టినట్లు అర్థమవుతోంది.