సెల్యూట్ చేస్తున్నా: గుజరాత్‌పై ఐశ్వర్యరాయ్ ప్రశంసలు

అహ్మదాబాద్: గుజరాత్ అభివృద్ధిపై ప్రముఖ సినీ నటి ఐశ్వర్యరాయ్ బచ్చన్ ప్రశంసల వర్షం కురిపించారు. ఐశ్వర్య గుజరాత్ ముఖ్యమంత్రి నరేంద్ర మోడీ పేరును ప్రస్తావించక పోయినప్పటికీ రాష్ట్ర అభివృద్ధిపై ఆమె చేసిన ప్రశంసలు మోడీకే వెళతాయి. ఆదివారం ఆమె వదోదరలో ఓ కార్యక్రమంలో పాల్గొనేందుకు వచ్చారు. ఈ సందర్భంగా ఆమె గుజరాత్ అభివృద్ధిపై మీడియాతో పిచ్చాపాటిగా మాట్లాడారు.

గుజరాత్ విజయగాథ తనను ఎంతో ముగ్ధురాలిని చేసిందని, నిజంగా అత్యంత అభినందనీయమైన విషయమని అన్నారు. గుజరాత్ సాధించిన విజయాల గురించి తనకు తెలుసునని, తనకు ఇక్కడ ఉంటే సొంత ఇంట్లో ఉన్నట్లుగా ఉంటుందన్నారు. నానాటికి గుజరాత్ బలోపేతమవుతోందని... ఈ విజయాన్ని తాను మనసారా అభినందిస్తున్నానని చెప్పారు. గుజరాత్ విజయగాథకు తాను సెల్యూట్ చేస్తున్నానన్నారు.

ఐశ్వర్యరాయ్ మామ అమితాబ్ బచ్చన్ గుజరాత్ సర్కారుకు బ్రాండ్ అంబాసిడర్‌గా ఉన్న విషయం తెలిసిందే. అమితాబ్ వల్ల గుజరాత్ పర్యాటక రంగంలో అనూహ్యమైన మెరుగుదల కనిపించిందని, సందర్శకుల సంఖ్య పెరిగిందని నరేంద్ర మోడీ ప్రభుత్వం కొంతకాలంగా చెప్పుకుంటోంది.

English summary

Without naming Mr Modi, actor Aishwarya Rai Bachchan today said, "I salute the success story of Gujarat." The 39-year-old actor, who was speaking at a promotional event in Vadodara, said, "I am familiar with the success story of Gujarat...I feel at home in the state. Gujarat has been going from strength to strength."