గీతిక తల్లి అనురాధ ఆత్మహత్య: కందా, అరుణపై కేసు

By Srinivas

Published: Sunday, February 17, 2013, 12:36 [IST]

న్యూఢిల్లీ: మాజీ ఎయిర్ హోస్టెస్ గీతిక తల్లి అనురాధ ఆత్మహత్య కేసులో హర్యానా మాజీ మంత్రి గోపాల్ కందా, ఆయన సహాయకురాలు అరుణ చద్దాలపై ఢిల్లీ పోలీసులు శనివారం కేసును నమోదు చేశారు. అరుణ మృతికి వారే కారకులనే ఆరోపణలతో కేసు నమోదయింది. శుక్రవారం గీతిక తల్లి అనురాధ ఆత్మహత్య చేసుకున్న విషయం తెలిసిందే. సంఘటన స్థలంలో మొదట ఎలాంటి సూసైడ్ లేఖలు దొరకలేదని వార్తలు వచ్చినప్పటికీ పోలీసులకు ఓ లేఖ దొరికింది.

తన ఆత్మహత్యకు గోపాల్ కందా, అరుణలే కారణమని ఆమె లేఖ రాసి పెట్టి ఆత్మహత్య చేసుకున్నారు. దీనిని స్వాధీనం చేసుకున్న పోలీసులు దాని ఆధారంగా కందా, అరుణలపై మరో కేసు నమోదు చేశారు. బంధువులు కూడా వారి పైనే ఆరోపణలు గుప్పించారు.

కాగా మాజీ ఎయిర్ హోస్టెస్ గీతిక శర్మ తల్లి అనురాధ శర్మ ఢిల్లీలోని తన నివాసంలో సీలింగ్ ఫాన్‌కు ఉరి వేసుకొని ఆత్మహత్యకు పాల్పడ్డ విషయం తెలిసిందే. కూతురు గీతిక ఆత్మహత్య చేసుకున్నప్పటి నుంచి ఆమె డిప్రెషన్‌లో ఉన్నారు. వాయువ్య ఢిల్లీలోని ఆశోక్ విహార్‌లోని తన నివాసంలో అనురాధ శర్మ శుక్రవారం ఉరేసుకొని ఆత్మహత్య చేసుకున్నారు. కుమార్తె మరణంతో ఆమె కుంగిపోయిందని చెప్పారు. అయితే, ఆత్మహత్యకు కారణం మాత్రం గోపాల్ కందా అని బంధువులు ఆరోపించారు.

గీతిక శర్మ ఆత్మహత్య తర్వాత అనురాధ శర్మ కూడా ఆత్మహత్యకు పాల్పడటంతో ఆ కుటుంబంలో విషాధ చాయలు నెలకొన్నాయి. పోలీసులు కేసును నమోదు చేసుకొని దర్యాఫ్తు చేస్తున్నారు. గీతిక ఆత్మహత్య కేసును వెనక్కి తీసుకోవాలనే కందా ఒత్తిడి కారణంగానే అనురాధ కూడా ఆత్మహత్య చేసుకున్నదని గీతిక తండ్రి కూడా ఆరోపించారు.

Published On February 17, 2013