కొడుకు మృతితో తల్లడిల్లి ఆగిన తల్లి గుండె.. తిరుపతి జిల్లాలో విషాద ఘటన

తల్లికి పిల్లలు అంటే ఎనలేని ప్రాణం. నవమాసాలు మోసి, తన ప్రాణాలు పణంగా పెట్టి, తన రక్తం పంచుకు పుట్టిన కొడుకుకు ఏదైనా చిన్న హాని జరిగిందంటే తల్లి మనసు తల్లడిల్లిపోతుంది. అమ్మ ప్రేమ గొప్పతనం అలాంటిది. పిల్లలంటే ప్రాణ సమానంగా చూసే తల్లి తన కొడుకు తన కళ్ళ ముందే ప్రాణాలు కోల్పోతే తట్టుకుంటుందా? తట్టుకోలేదు.

అలా తల్లడిల్లిన తల్లి గుండె కొడుకు మృతితో ఆగిపోయింది. ఇక ఈ విషాద ఘటన ఆంధ్రప్రదేశ్ రాష్ట్రంలోని తిరుపతి జిల్లా చంద్రగిరి మండలం తుంగరాంపల్లి లో చోటు చేసుకుంది. తిరుపతిలోని సిమ్స్ హాస్పిటల్ లో కాంట్రాక్టు ఉద్యోగిగా పనిచేస్తున్న శంకర్ భార్యా పిల్లలతో సంతోషంగా జీవిస్తున్నాడు. 35 సంవత్సరాల శంకర్ మంగళవారం సాయంత్రం ఇంట్లో పనుల్లో భాగంగా బాత్రూంలో బల్బు వెలగడం లేదని రిపేర్ చేద్దామని వెళ్ళాడు.

అయితే రిపేర్ చేస్తున్న క్రమంలో విద్యుత్ షాక్ తగిలి బాత్రూం లోనే కుప్పకూలి మరణించాడు. కొడుక్కి విద్యుత్ షాక్ తగిలిందని అక్కడకు వెళ్లి విగతజీవిగా పడి ఉన్న కొడుకుని చూసిన తల్లి గుండె తల్లడిల్లిపోయింది. దీంతో తల్లి చంద్రమ్మ కూడా గుండెపోటుతో కుప్పకూలి అక్కడికక్కడే మరణించింది. మృతుడు శంకర్ కు భార్య, ఇద్దరు పిల్లలు.

ఇక ఒకే కుటుంబంలో తల్లి, కుమారుడు మృతి చెందడంతో ఆ గ్రామంలో విషాదఛాయలు అలముకున్నాయి. ఊహించని విధంగా చోటుచేసుకున్న ఈ దుర్ఘటన గ్రామస్తులు అందరినీ కంటతడి పెట్టించింది. విద్యుదాఘాతంతో కొడుకు, మరణించిన కొడుకుని చూసిన తల్లి ఇద్దరూ కానరాని లోకాలకు చేరిపోవడంతో కుటుంబ సభ్యులతో పాటు ఊరు ఊరంతా కన్నీరు పెట్టుకుంది. కొడుకుపై తల్లి ప్రేమను అందరూ చెప్పుకుంటున్నారు.

English summary

A mother died with heart attack after her son died due to electric shock. A tragic incident took place in Tirupati district.