‘మెగా’ గుడ్ న్యూస్: ఇక 21 రకాల వైకల్యాలకు ‘సదరం’ సర్టిఫికెట్లు!

రాష్ట్రంలోని దివ్యాంగుల సంక్షేమమే ధ్యేయంగా కూటమి ప్రభుత్వం మరో కీలక అడుగు వేసింది. దివ్యాంగుల ధ్రువీకరణ పత్రాల (SADAREM) జారీలో ఏళ్ల తరబడి ఎదురవుతున్న ఇబ్బందులకు స్వస్తి పలుకుతూ, సరికొత్త సాంకేతిక విప్లవానికి శ్రీకారం చుట్టింది. ఇప్పటివరకు కొన్ని రకాల వైకల్యాలకే పరిమితమైన సర్టిఫికెట్లను, ఇకపై కేంద్ర ప్రభుత్వ 'ఆర్పీడబ్ల్యూడీ' (RPwD) చట్టం-2016 ప్రకారం మొత్తం 21 రకాల వైకల్యాలకు విస్తరిస్తున్నట్లు రాష్ట్ర వైద్య ఆరోగ్యశాఖ మంత్రి శ్రీ సత్యకుమార్ యాదవ్ ప్రకటించారు.

గతంలో 2010 నుంచి ఉన్న పాత సాఫ్ట్‌వేర్ వల్ల తరచూ సాంకేతిక సమస్యలు తలెత్తుతుండటంతో, ప్రభుత్వం అత్యాధునిక సాఫ్ట్‌వేర్‌ను రూపొందించింది. ఇప్పటివరకు 13 రకాల వైకల్యాలకు ఆన్‌లైన్‌లో, మరో 3 రకాలకు (హీమోఫీలియా, థాలసీమియా, సికిల్ సెల్) మ్యానువల్ పద్ధతిలో సర్టిఫికెట్లు ఇచ్చేవారు. అయితే, ఇకపై ఈ 16 రకాలతో పాటు కొత్తగా చేర్చిన మరో 5 రకాలకు కూడా పూర్తిస్థాయిలో డిజిటల్ విధానంలోనే సర్టిఫికెట్లు జారీ చేయనున్నారు. దీనివల్ల మధ్యవర్తుల ప్రమేయం లేకుండా, అత్యంత పారదర్శకంగా వైకల్య శాతం లెక్కించబడుతుంది.

కీలక తేదీలు.. స్లాట్ బుకింగ్ వివరాలు

దివ్యాంగుల సౌకర్యార్థం సదరం స్లాట్ బుకింగ్ ప్రక్రియను ప్రభుత్వం సరళీకరించింది:

• మార్చి 25: గ్రామ/వార్డు సచివాలయాల ద్వారా స్లాట్ బుకింగ్ ప్రారంభమవుతుంది.
• మార్చి 30: ఎంపిక చేసిన ఆసుపత్రుల్లో వైద్య శిబిరాలు, నిర్ధారణ పరీక్షలు మొదలవుతాయి.

ముఖ్యమైన విషయం ఏంటంటే, గతంలో 40 శాతం వైకల్యం ఉంటేనే సర్టిఫికెట్ ఇచ్చేవారు. కానీ, కొత్త నిబంధనల ప్రకారం వైకల్య శాతం ఎంత ఉన్నా సరే సర్టిఫికెట్ జారీ చేస్తారు. అయితే, ప్రభుత్వ నిబంధనల ప్రకారం 40 శాతం లేదా అంతకంటే ఎక్కువ వైకల్యం ఉన్నవారికే పెన్షన్ వంటి ఇతర ప్రయోజనాలు అందుతాయి.

కొత్తగా చేరిన ఆ 'ఐదు' జబ్బులు ఇవే!

కేంద్ర ప్రభుత్వం గుర్తించిన జాబితా ప్రకారం తాజాగా మరో 5 రకాలను ఏపీ ప్రభుత్వం సదరం పరిధిలోకి తెచ్చింది:

• ఆమ్ల దాడి బాధితులు (Acid Attack Victims)
• మాట మరియు భాష లోపం (Speech & Language Disability)
• ప్రత్యేక అభ్యాస లోపాలు (Specific Learning Disability)
• ఆటిజం స్పెక్ట్రం రుగ్మత (Autism Spectrum)
• బహుళ వైకల్యాలు (Multiple Disabilities)

సదరం సర్టిఫికెట్ జారీ చేసే 21 రకాల వైకల్యాల పూర్తి జాబితా:

• Blindness - అంధత్వం
• Low Vision - తక్కువ చూపు
• Leprosy Cured Persons - కుష్ఠు వ్యాధి నయం అయిన వారు
• Hearing Impairment (Deaf and Hard of Hearing) - వినికిడి లోపం (చెవిటితనం)
• Locomotor Disability - చలన వైకల్యం
• Dwarfism - కురచకాయం
• Intellectual Disability - మానసిక రుగ్మత
• Mental Illness - మానసిక వ్యాధి
• Autism Spectrum Disorder - ఆటిజం స్పెక్ట్రం రుగ్మత
• Cerebral Palsy - సెరెబ్రల్ పాల్సీ
• Muscular Dystrophy - కండరాల క్షీణత వ్యాధి
• Chronic Neurological Conditions - దీర్ఘకాల నాడీ సంబంధ వ్యాధులు
• Specific Learning Disabilities - ప్రత్యేక అభ్యాస లోపాలు
• Multiple Sclerosis - మల్టిపుల్ స్క్లిరోసిస్
• Speech and Language Disability - మాట మరియు భాష లోపం
• Thalassemia - థాలసీమియా
• Hemophilia - హీమోఫీలియా
• Sickle Cell Disease - సికిల్ సెల్ వ్యాధి
• Multiple Disabilities including Deafblindness - బహుళ వైకల్యాలు (చెవిటి-అంధత్వం సహా)
• Acid Attack Victims - ఆమ్ల దాడి బాధితులు
• Parkinson's Disease - పార్కిన్సన్స్ వ్యాధి

English summary

Andhra Pradesh government has revamped the SADAREM system to issue disability certificates for 21 types of disabilities. Slot booking starts March 25 at Secretariats. Learn about the new software and categories.