శాతకర్ణి ఉత్సాహం: స్వగ్రామంలో బాలయ్య సంక్రాంతి సంబరాలు

గౌతమిపుత్ర శాతకర్ణి చిత్రం ఘన విజయం సాధించడంతో ఉత్సాహంలో ఉన్న నందమూరి బాలకృష్ణ అదే ఉత్సాహంతో సంక్రాంతి పండగను జరుపుకుంటున్నారు.

విజయవాడ: ఇటీవల విడుదలైన గౌతమిపుత్ర శాతకర్ణి చిత్రం ఘన విజయం సాధించడంతో ఉత్సాహంలో ఉన్న టాలీవుడ్ హీరో, హిందూపురం ఎమ్మెల్యే నందమూరి బాలకృష్ణ అదే ఉత్సాహంతో సంక్రాంతి పండగను జరుపుకుంటున్నారు. కృష్ణా జిల్లా పామర్రు మండలంలోని కొమరవోలు, నిమ్మకూరులో సంక్రాంతి వేడుకల్లో పాల్గొన్నారు.

మొదట నందమూరి తారకరామారావు, బసవతారకం దంపతుల విగ్రహాలకు పూలమాలలు వేసి నివాళులర్పించారు. అక్కడి నుంచి స్వగ్రామానికి ఎడ్లబండిపై ప్రదర్శనగా వెళ్లారు. చిన్నారులకు భోగిపళ్లు పోశారు. ధాన్యం రాశులకు పూజలు చేసి రైతులను సన్మానించారు.

అనంతరం పశుప్రదర్శనను వీక్షించారు. సంక్రాంతి పండగకు సొంత గ్రామానికి రావడం సంతోషంగా ఉందని అన్నారు. గౌతమిపుత్ర శాతకర్ణి సినిమాను ఆదరించిన అభిమానులకు, ప్రేక్షకులకు ఈ సందర్భంగా బాలకృష్ణ ధన్యవాదాలు తెలిపారు.

చారిత్రక కథ ఉన్న సినిమాకు రెండు తెలుగు రాష్ట్రాల ముఖ్యమంత్రులు వినోద పన్ను రాయితీ ఇవ్వడం శుభ పరిణామమని చెప్పిన బాలకృష్ణ, ఇద్దరు సీఎంలకు బాలకృష్ణ కృతజ్ఞతలు తెలిపారు. బాలకృష్ణ వెంట రాష్ట్రమంత్రి కొల్లు రవీంద్ర, మచిలీపట్నం ఎంపీ కొనకళ్ల నారాయణ, స్థానిక ఎమ్మెల్యే ఉప్పులేటి కల్పన, టిడిపి నేత వర్ల రామయ్య తదితరులు ఉన్నారు.

English summary

cine hero and MLA Nandamuri Balakrishna participated in Sankranti festival.