ఎక్కడెక్కడ పోటీ చేద్దాం ? నేతలతో పవన్ చర్చలు ! రెండు రోజుల్లో క్లారిటీ..!

ఏపీలో టీడీపీతో పొత్తు పెట్టుకుని వచ్చే ఎన్నికల్లో పోటీ చేసేందుకు సిద్దమైన జనసేన పార్టీ అధినేత పవన్ కళ్యాణ్.. ముందు సొంత పార్టీలో సీట్ల సమీకరణాలపై దృష్టిపెట్టారు. ఇందులో భాగంగా జనసేన నేతలతో వరుస చర్చలు కొనసాగిస్తున్నారు. ఇందులో జనసేన పోటీ చేసే నియోజకవర్గాలపై చర్చిస్తున్నారు. వీటిపై క్లారిటీ వస్తే అనంతరం టీడీపీతో సీట్ల పంపకాలపై చర్చించవచ్చని ఆయన భావిస్తున్నారు.

గుంటూరు జిల్లా మంగళగిరిలోని జనసేన కేంద్ర కార్యాలయంలో పవన్ కల్యాణ్ పార్టీ నేతలతో కీలక చర్చలు జరుపుతున్నారు. ఇందులో రానున్న ఎన్నికల్లో జనసేన పోటీ చేసే స్థానాల ఎంపికపై చర్చిస్తున్నట్లు తెలుస్తోంది. పవన్ తో జరుగుతున్న చర్చల్లో జనసేన పీఏసీ సభ్యులు, పార్టీ కీలక నేతలను పిలిపించారు. వీరి అభిప్రాయాల ఆధారంగా తదుపరి నిర్ణయాలు తీసుకునేందుకు పవన్ సిద్ధమవుతున్నారు.

జనసేన పార్టీ ఆఫీసులో నేతల బలాబలాలపై పవన్, నాదెండ్ల మనోహర్ ఇవాళ చర్చలు జరుపుతున్నారు. టీడీపీ, జనసేన పొత్తు నేపథ్యంలో ఇరుపక్షాల కార్యకర్తలు కలిసి పనిచేసేలా తీసుకోవాల్సిన చర్యలపై కూడా నేతలు చర్చిస్తున్నారు. ముఖ్యంగా జనసేన పోటీ చేసే స్థానాల్లో ఇరుపక్షాల బలాబలాపై కూడా పవన్ ఆరా తీస్తున్నట్లు తెలుస్తోంది. ఈ చర్చలు రేపు, ఎల్లుండి కూడా కొనసాగే అవకాశముంది. ఉభయగోదావరి జిల్లాలు, విశాఖ, కృష్ణా, గుంటూరు, తిరుపతి, అనంతపురం జిల్లాల నేతలతో పవన్ ఇవాళ చర్చిస్తున్నారు.

జనసేన పోటీ చేయాలనుకుంటున్న స్థానాలపై రెండురోజుల్లో నిర్ణయానికి వచ్చే అవకాశం ఉందని పార్టీ వర్గాలు చెప్తున్నాయి. అనంతరం టీడీపీతో సీట్ల సర్ధుబాటుపై చర్చలు జరిపే అవకాశం ఉంది. ఇప్పటికే టీడీపీ 25 నుంచి 28 సీట్లను జనసేనకు ఆఫర్ చేస్తున్నట్లు ప్రచారం జరుగుతోంది. వీటిలో ఏయే స్ధానాలు తీసుకోవాలనే అంశంపై పవన్ ఇప్పుడు చర్చిస్తున్నట్లు తెలుస్తోంది. అలాగే సీఎం పదవి చంద్రబాబుకు అప్పగించడంపై హరిరామజోగయ్య వంటి వారు పవన్ ను నిలదీస్తున్నారు. దీనిపైనా చర్చ జరుగుతున్నట్లు తెలుస్తోంది.

English summary

janasena party chief pawan kalyan continues discussion on party's contesting constituencies in the state with leaders today.