విజయవాడలో 144 సెక్షన్, సెక్షన్ 30- ఉద్యోగులకు పోలీసు కమిషనర్ వార్నింగ్..

విజయవాడ నగరం ఇవాళ్టి నుంచి పోలీసుల గుప్పిట్లోకి వెళ్లబోతోంది. నగరంలో సెక్షన్ 144, పోలీసు యాక్ట్ 30 ప్రకారం ఆంక్షలు విధిస్తూ నగర పోలీసు కమిషనర్ కాంతిరాణా టాటా ఇవాళ వీడియో ప్రకటన విడుదల చేశారు. ఇందులో ఆంక్షలు విధించడానికి గల కారణాలను ఆయన వెల్లడించారు. అలాగే ఆంక్షలు ఉల్లంఘిస్తే నాన్ బెయిలబుల్ సెక్షన్ల కింద చర్యలు తప్పవని హెచ్చరికలు జారీ చేశారు. ప్రభుత్వం ఈ విషయంలో కఠినంగా వ్యవహరిస్తుందన్నారు.

రాష్ట్రంలో విద్యుత్ ఉద్యోగులు గత కొన్ని రోజులుగా నిరసనలు చేపడుతున్నారు. దీర్ఘకాలంగా అపరిష్కృతంగా ఉన్న 12 డిమాండ్ల సాధన కోసం సమ్మెకు కూడా పిలుపునిచ్చారు. అయితే ప్రభుత్వం చివరి నిమిషంలో విద్యుత్ జేఏసీ నాయకులతో చర్చలు జరిపి సమ్మెను విరమింపజేసింది. అయితే నాయకులు సమ్మె వాయిదా వేసుకుంటున్నట్లు ప్రకటించినా కిందిస్ధాయిలో ఉద్యోగులు మాత్రం వెనక్కి తగ్గలేదు. దీంతో నిరసనల పర్వం కొనసాగుతోంది.

మరోవైపు ఈ నెల 17న విద్యుత్ ఉద్యోగులు విజయవాడలో ఛలో విద్యుత్ సౌధ, ధర్నాలకు పిలుపునిచ్చారు. దీంతో పోలీసులు కూడా అప్రమత్తం అయ్యారు. విద్యుత్ ఉద్యోగుల నిరసనల వల్ల తలెత్తే పరిణామాలపై ఓ అంచనాకు వచ్చిన పోలీసులు ఎక్కడికక్కడ భద్రత పెంచుతున్నారు. విద్యుత్ సౌధతో పాటు ఇతర విద్యుత్ శాఖ కార్యాలయాల వద్ద కూడా భద్రత పెంచారు. అలాగే ఎక్కువమంది గుమికూడకుండా ఆంక్షలు విధిస్తూ ఇవాళ కమిషనర్ ఓ ప్రకటన చేశారు.

విద్యుత్ ఉద్యోగులు విజయవాడలో చేపడుతున్న ఛలో విద్యుత్ సౌధ, ధర్నాలకు పోలీసు శాఖ నుంచి ఎలాంటి అనుమతులు లేవని కమిషనర్ కాంతి రాణా టాటా వెల్లడించారు. 144సెక్షన్, పోలీసు యాక్ట్ 30 అమల్లో ఉందని తెలిపారు. నిబంధనలు ఉల్లంఘించి ధర్నాలో పాల్గొంటే ఎస్మా కూడా ప్రయోగించి చర్యలు తీసుకుంటామని హెచ్చరించారు. అలాగే అనుమతి లేకుండా విజయవాడలో నిరసనల్లో పాల్గొంటే ఐపీసీ సెక్షన్ 143, 427, 452, 283, 341, 506 ప్రయోగిస్తామని, ఇందులో నాన్ బెయిలబుల్ సెక్షన్లు కూడా ఉన్నాయని కమిషనర్ తెలిపారు.

English summary

vijayawada police commissioner has imposed restrictions in the city under crpc section 144 and police act section 30 in the wake of electricity employees' chalo vidhyut soudha call.