తిరుమలలో సింహ‌ వాహనంపై యోగ‌న‌ర‌సింహుడి అలంకారంలో శ్రీ‌ మలయప్ప స్వామి !

తిరుమల/తిరుపతి: తిరుమలలో సింహ‌ వాహనంపై యోగ‌న‌ర‌సింహుడి అలంకారంలో శ్రీ‌ మలయప్ప స్వామి భక్తులను ఆశీర్వదించారు.

తిరుమలలో శ్రీవారి సాలకట్ల బ్రహ్మోత్సవాల్లో మూడో రోజైన బుధ‌వారం ఉదయం శ్రీ మలయప్పస్వామి సింహ‌ వాహనంపై యోగ‌న‌ర‌సింహుడి అలంకారంలో భక్తులకు దర్శనమిచ్చారు.

వాహనం ముందు గజరాజులు నడుస్తుండగా, భక్తజన బృందాలు భజనలు, కోలాటాలు, జీయ్యంగార్ల ఘోష్టితో స్వామివారిని కీర్తిస్తుండగా, మంగళవాయిద్యాల నడుమ స్వామివారి వాహనసేవ కోలాహలంగా జరిగింది.

సింహ వాహనం ధైర్య‌సిద్ధి అని పురాణాలు చెబుతున్నాయి.

శ్రీవారు మూడో రోజు ఉదయం దుష్టశిక్షణ, శిష్టరక్షణ కోసం సింహ వాహ‌నాన్ని అధిరోహించారు.

సింహం పరాక్రమానికి, ధైర్యానికి, తేజస్సుకు, ఆధిపత్యానికి, మహాధ్వనికి సంకేతం. ఉదయం నిద్ర లేవగానే దర్శించే వస్తువుల్లో సింహదర్శనం అతి ముఖ్యమయింది. సింహ రూప దర్శనంతో పైన పేర్కొన్న శక్తులన్నీ చైతన్యవంత‌మ‌వుతాయి. సోమరితనం నశించి పట్టుదలతో ప్రవర్తించి విజ‌య‌స్ఫూర్తి సిద్ధిస్తుంది.

అజ్ఞానంతో ప్రవర్తించే దుష్టులను హరించడంలో నేను, నా వాహనమైన సింహమూ సమాన ప్రయత్నంతో ఉంటామని ఈ సింహ వాహనోత్సవం ద్వారా శ్రీవారు నిరూపించారు. తిరుమలలో రాత్రి 7 నుంచి 9 గంటల వరకు ముత్య‌పుపందిరి వాహనంపై స్వామివారు అభ‌య‌మిస్తారు.

వాహ‌న‌సేవ‌లో తిరుమ‌ల శ్రీ‌శ్రీ‌శ్రీ పెద్ద‌జీయ‌ర్‌స్వామి, తిరుమ‌ల శ్రీ‌శ్రీ‌శ్రీ చిన్న‌జీయ‌ర్‌స్వామి, టీటీడీ అధికారులు, వేలాది మంది భక్తులు పాల్గొన్నారు.

తిరుమలలో భక్తుల రద్దీ సాదారణంగా ఉంది. మంగళవారం తిరుమలలో శ్రీవారిని 67, 267 మంది భక్తులు దర్శించుకున్నారు. తిరుమలలో శ్రీవారికి 20, 628 మంది భక్తులు తలనీలాలు సమర్పించుకుని మొక్కులు తీర్చుకున్నారు. హుండి కానుకల ద్వారా శ్రీవారికి రూ. 2 కోట్లా 58 లక్షల రూపాయల ఆదాయం వచ్చింది. తిరుమలలో రెండు కంపార్ట్ మెంట్లలో భక్తులు వేచి ఉండగా మంగళవారం శ్రీవారిని దర్శించుకోవడానికి రెండు గంటల మాత్రమే సమయం పట్టింది.

English summary

Sri Malayappaswamy in decoration of Yoganarasimhu on lion vehicle in Tirumala