లైంగిక వేధింపులు: జేడీఎస్ ఎంపీ ప్రజ్వల్, అతని తండ్రి రేవన్నపై కేసు నమోదు

బెంగళూరు: మాజీ ప్రధాని, జేడీఎస్ అగ్రనేత దేవెగౌడ తనయుడు రేవన్న (Revanna)తోపాటు ఆయన మనవడు ఎంపీ ప్రజ్వల్ రేవన్నలపై పోలీసులు లైంగిక వేధింపుల కేసు నమోదు చేశారు. ఓ మహిళ ఫిర్యాదు మేరకు హోలెనరసిపూర్ పోలీసులు ఈ మేరకు ఎఫ్ఐఆర్ నమోదు చేశారు.

మరోవైపు, ప్రజ్వల్‌కు సంబంధించినవిగా చెబుతున్న అసభ్యకర వీడియోల వ్యవహారంలో దర్యాప్తు కోసం కర్ణాటక ప్రభుత్వం ముగ్గురు సభ్యులతో కూడిన ప్రత్యేక దర్యాప్తు బృందం(SIT) ఏర్పాటు చేసింది. ఈ వ్యవహారంలో సిట్ ను ఏర్పాటు చేయాలని అంతకుముందు రాష్ట్ర మహిళా కమిషన్ ఛైర్ పర్సన్ ప్రభుత్వానికి లేఖ రాసింది.

లోక్‌సభ ఎన్నికలో భాగంగా హసన్ స్థానం నుంచి జేడీఎస్ తరపున ప్రజ్వల్ మరోసారి బరిలో దిగారు. కాగా, ఏప్రిల్ 26నే ఈ స్థానానికి పోలింగ్ ముగిసింది. అయితే, పోలింగ్ కు ముందు నుంచే ప్రజ్వల్‌కు సంబంధించినవిగా చెబుతున్న అసభ్యకర వీడియోలు హసన్ జిల్లాలో వైరల్‌గా మారాయి.

ఈ పరిణామాల నేపథ్యంలో ప్రజ్వల్ ఆదివారం ఉదయం బెంగళూరు నుంచి ఫ్రాంక్‌ఫర్ట్‌కు బయల్దేరి వెళ్లడం చర్చనీయాంశంగా మారింది. రేవన్న పేరు చెడగొట్టడానికే కొంత మంది కలిసి ఈ వీడియో క్లిప్‌లను వ్యాప్తి చేశారని జేడీఎస్-బీజేపీ ఎలక్షన్ ఏజెంట్ పూర్ణచంద్ర గౌడ్ ఇప్పటికే పోలీసులకు ఫిర్యాదు చేశారు.

English summary

Case against Karnataka MP prajwal, father Revanna for sex harassment of house help.