No Amazon Layoffs: ఊపిరి పీల్చుకున్న ఉద్యోగులు, అసలేం జరిగింది?

ప్రపంచ ఈ-కామర్స్ దిగ్గజం అమెజాన్ మరోసారి భారీగా ఉద్యోగులను తొలగించబోతోందన్న వార్తలు ఇటీవల ఐటీ రంగంలో కలకలం రేపాయి. ముఖ్యంగా 2026 మే నెలలో అమెజాన్ వెబ్ సర్వీసెస్ (AWS), రిటైల్ మరియు హ్యూమన్ రిసోర్సెస్ (HR) విభాగాల్లో దాదాపు 14,000 మందిని ఇంటికి పంపనున్నట్లు వార్తలు వచ్చాయి. అయితే, ఈ నివేదికలు పూర్తిగా వాస్తవ విరుద్ధమని, ఇందులో ఎటువంటి నిజం లేదని అమెజాన్ ప్రతినిధి ఒకరు స్పష్టం చేశారు.

ఉద్యోగులు తమ అభిప్రాయాలను పంచుకునే 'బ్లైండ్' (Blind) అనే ఫోరమ్‌లో ఒక యూజర్ పెట్టిన పోస్ట్ ఈ వార్తలకు ఆజ్యం పోసింది. చైనాకు చెందిన ఒక టెక్ పోర్టల్ ఈ వార్తను ప్రముఖంగా ప్రచురించింది. ముఖ్యంగా వైట్ కాలర్ ఉద్యోగులు (L5 నుంచి L7 స్థాయి వారు) ఈ కోతలకు గురవుతారని, చైనాలోని కొన్ని బృందాలపై దీని ప్రభావం ఉంటుందని ఆ నివేదిక పేర్కొంది. అయితే గోదాముల్లో పనిచేసే సిబ్బందికి, లాజిస్టిక్స్ విభాగానికి ఎటువంటి ముప్పు లేదని ఆ పోస్ట్‌లో పేర్కొన్నారు.

నిర్వహణ ఖర్చుల తగ్గింపుపై గతంలో వ్యాఖ్యలు..

కోవిడ్ సమయంలో డిమాండ్‌కు అనుగుణంగా భారీగా నియామకాలు చేపట్టిన అమెజాన్, గత మూడేళ్లుగా ఆపరేషన్లను క్రమబద్ధీకరించే పనిలో ఉంది. 2025 జూన్‌లో సీఈఓ ఆండీ జస్సీ పంపిన ఒక మెమోలో, "నేడు జరుగుతున్న కొన్ని పనులను చేయడానికి భవిష్యత్తులో మాకు తక్కువ మంది వ్యక్తులు అవసరం అవుతారు" అని పేర్కొన్నారు. ఇది కాకుండా, కృత్రిమ మేధ (AI) వాడకం పెరగడం వల్ల కూడా కొన్ని ఉద్యోగాల్లో కోతలు ఉండవచ్చని గతంలో అంచనాలు వెలువడ్డాయి.

గత మూడేళ్లలో ఉద్యోగ కోతలు..

అమెజాన్ గడిచిన కొన్నేళ్లలో ఇప్పటికే పలు విడతలుగా లేఆఫ్స్ చేపట్టింది:

• 2023 నుంచి ఇప్పటివరకు: సుమారు 57,000 మందిని తొలగించింది.
• అక్టోబర్ 2025 నుంచి: దాదాపు 30,000 మంది ఉద్యోగులు సంస్థను వీడాల్సి వచ్చింది.
• ముఖ్యంగా మిడిల్ మేనేజ్మెంట్, హెచ్ఆర్ మరియు మార్కెటింగ్ విభాగాలపై ఈ ప్రభావం ఎక్కువగా పడింది.

తాజా ప్రచారాన్ని కంపెనీ కొట్టిపారేసినప్పటికీ, అమెజాన్ తీసుకుంటున్న పునర్వ్యవస్థీకరణ నిర్ణయాలపై ఉద్యోగుల్లో మాత్రం కొంత ఆందోళన కొనసాగుతోంది.

English summary

Amazon has officially denied reports claiming it plans to lay off 14,000 employees in May 2026. Addressing rumors from job forums and tech portals, the company spokesperson labeled the claims as false. While Amazon has streamlined operations in the past, it confirms that the latest reports of AWS and retail cuts are inaccurate.