Budget 2026: బైబ్యాక్‌లపై పన్ను, మార్కెట్‌లో భయాందోళన

కేంద్ర బడ్జెట్ ప్రకటనల ప్రభావంతో దేశీయ స్టాక్ మార్కెట్లు తీవ్ర ఒడిదుడుకులకు లోనవుతున్నాయి. కంపెనీల షేర్ బైబ్యాక్‌లపై పన్ను విధింపు, ఫ్యూచర్స్-ఆప్షన్స్ ట్రేడింగ్‌పై సెక్యూరిటీ ట్రాన్సాక్షన్ ట్యాక్స్ (STT) పెంపు వంటి కీలక నిర్ణయాలు మదుపర్లను తీవ్రంగా ఆందోళనకు గురిచేశాయి. ఫలితంగా సూచీలు భారీ నష్టాల్లోకి జారుకున్నాయి.

మధ్యాహ్నం 12.30 గంటల ప్రాంతంలో సెన్సెక్స్‌ ఏకంగా 1,367 పాయింట్లు కోల్పోయి 80,675 స్థాయికి పడిపోయింది. అదే సమయంలో నిఫ్టీ 535 పాయింట్ల నష్టంతో 24,785 వద్ద ట్రేడవుతోంది. అంతకుముందు ఒక దశలో సెన్సెక్స్ దాదాపు 2,000 పాయింట్లు, నిఫ్టీ 700 పాయింట్లకు పైగా కుప్పకూలి మదుపర్లలో భయాన్ని రెట్టింపు చేశాయి.

బడ్జెట్ నేపథ్యంలో ఆదివారం అయినప్పటికీ స్టాక్ మార్కెట్లు ప్రత్యేకంగా పని చేస్తున్నాయి. బడ్జెట్ ప్రసంగానికి ముందు మార్కెట్లు పెద్దగా మార్పుల్లేకుండా ఫ్లాట్‌గా ప్రారంభమయ్యాయి. ఆర్థిక మంత్రి నిర్మలా సీతారామన్ ప్రసంగం ప్రారంభమైన తర్వాత సూచీలు స్వల్ప లాభాల్లోకి వెళ్లాయి. కానీ బైబ్యాక్‌లపై పన్ను విధింపు, ఎస్‌టిటి పెంపు వంటి ప్రతిపాదనలు వెలువడిన వెంటనే మార్కెట్ దిశ పూర్తిగా మారిపోయింది. ఒక్కసారిగా భారీ అమ్మకాలు వెల్లువెత్తి సూచీలు లోతైన నష్టాల్లోకి జారుకున్నాయి.

Stock Market కొనుగోలు, అమ్మకాలపై ప్రభావం..

స్టాక్ ఎక్స్ఛేంజీల్లో లిస్టెడ్ సెక్యూరిటీల కొనుగోలు, అమ్మకాలపై వసూలు చేసే సెక్యూరిటీ ట్రాన్సాక్షన్ ట్యాక్స్‌ను బడ్జెట్‌లో 0.02 శాతం నుంచి 0.05 శాతానికి పెంచారు. అలాగే ఆప్షన్స్ ప్రీమియంపై ఎస్‌టిటిని 0.15 శాతానికి పెంచారు. మరోవైపు, కంపెనీలు చేసే షేర్ బైబ్యాక్‌లను ఇకపై మూలధన లాభాలుగా పరిగణించి పన్ను విధించాలని ప్రభుత్వం నిర్ణయించింది. అక్రమ మార్గాల్లో లాభాలు పొందే ప్రయత్నాలకు అడ్డుకట్ట వేయడమే ఈ మార్పుల వెనుక ఉద్దేశమని మంత్రి వివరించారు.

కొత్త నిబంధనల ప్రకారం కార్పొరేట్ ప్రమోటర్లకు బైబ్యాక్‌లపై 22 శాతం, నాన్-కార్పొరేట్ ప్రమోటర్లకు 30 శాతం పన్ను విధించారు. ఈ నిర్ణయాలు మార్కెట్ సెంటిమెంట్‌పై తీవ్ర ప్రతికూల ప్రభావం చూపాయి. ముఖ్యంగా షార్ట్‌టర్మ్ ట్రేడర్లు, డెరివేటివ్స్ మార్కెట్‌పై ఆధారపడే మదుపర్లు ఒక్కసారిగా వెనక్కి తగ్గడంతో అమ్మకాల ఒత్తిడి పెరిగింది.

మొత్తంగా చూస్తే, బడ్జెట్‌లో తీసుకున్న పన్ను నిర్ణయాలు తక్షణ మార్కెట్ ప్రతిచర్యగా భారీ నష్టాలకు దారితీశాయి. రాబోయే సెషన్లలో మదుపర్లు ఈ కొత్త నిబంధనలకు ఎలా స్పందిస్తారన్నదే మార్కెట్ దిశను నిర్ణయించనుంది.

English summary

Indian stock markets plunged sharply after Budget 2026 announcements as higher STT on futures and options and new tax on share buybacks rattled investor sentiment, dragging Sensex and Nifty deep into losses.