ట్రంప్ టారిఫ్ దెబ్బ.. 3 రోజుల్లో రూ.15 లక్షల కోట్లు స్వాహా!

Stock Market Crash: భారతీయ స్టాక్ మార్కెట్ ఇన్వెస్టర్లకు బుధవారం మరో బ్లాక్ డేగా మారింది. వరుసగా మూడో రోజు మార్కెట్లు భారీ నష్టాలను చవిచూశాయి. అంతర్జాతీయ ప్రతికూల పవనాలు, ముఖ్యంగా అమెరికా అధ్యక్షుడు డొనాల్డ్ ట్రంప్ ప్రకటిస్తున్న వాణిజ్య విధానాల దెబ్బకు దలాల్ స్ట్రీట్ వణికిపోయింది.

ఒక్కరోజే 1100 పాయింట్లు పతనం
బుధవారం ఉదయం నుంచే మార్కెట్లు ఒడుదొడుకులతో ప్రారంభమయ్యాయి. ఒక దశలో 82,282 గరిష్ట స్థాయికి చేరిన సెన్సెక్స్, నిమిషాల వ్యవధిలోనే 1,158 పాయింట్లు పతనమై 81,124 కనిష్ట స్థాయికి పడిపోయింది. నిఫ్టీ కూడా అదే బాటలో పయనిస్తూ రోజువారీ గరిష్టాల నుంచి 358 పాయింట్లు నష్టపోయి 24,919 స్థాయికి చేరింది.

రూ.15 లక్షల కోట్లు గోవిందా!
వరుసగా మూడు రోజులు మార్కెట్లు పతనం కావడంతో ఇన్వెస్టర్ల సంపద ఆవిరైపోయింది. సోమవారం నాటికి రూ. 465.68 లక్షల కోట్లుగా ఉన్న బీఎస్‌ఈ మార్కెట్ క్యాపిటలైజేషన్, బుధవారం నాటికి దాదాపు రూ. 453 లక్షల కోట్లకు పడిపోయింది. అంటే కేవలం మూడు రోజుల్లోనే ఇన్వెస్టర్లు సుమారు 15 లక్షల కోట్ల రూపాయల సంపదను కోల్పోయారు.

మార్కెట్ పతనానికి ప్రధాన కారణాలు
మార్కెట్ నిపుణుల విశ్లేషణ ప్రకారం, ఈ భారీ పతనానికి వెనుక ఉన్న కారణాలు ఇలా ఉన్నాయి. యూరోపియన్ దేశాలపై ట్రంప్ విధిస్తున్న సుంకాలు, గ్రీన్‌లాండ్ పాలసీ ప్రపంచ వాణిజ్య యుద్ధానికి దారితీస్తాయనే భయం మార్కెట్ పతనానికి కారణమయ్యాయి. ఆసియా, యూరోపియన్ మార్కెట్లు నష్టాల్లో ఉండటం భారత మార్కెట్లపై ప్రతికూల ప్రభావం చూపింది. ఇరాన్, అమెరికా మధ్య పెరుగుతున్న మాటల యుద్ధం భౌగోళిక రాజకీయ అనిశ్చితిని పెంచింది.

నష్టపోయిన ప్రధాన షేర్లు
బుధవారం ట్రేడింగ్‌లో భారీగా దెబ్బతిన్న షేర్లు ఇవే:

లార్జ్ క్యాప్: ఐసీఐసీఐ బ్యాంక్, ఎల్‌అండ్‌టీ, ట్రెంట్, బీఈఎల్.

మిడ్ క్యాప్: కల్యాణ్ జ్యువెలర్స్ (11.53% పతనం), పేటీఎం, కోఫోర్జ్.

స్మాల్ క్యాప్: రామ స్టీల్, ఐనాక్స్ గ్రీన్.

English summary

Indian stock markets witnessed a massive crash as Trump’s tariff policies triggered global fears. Sensex plunged over 1100 points, wiping out ₹15 lakh crore in investor wealth.