Hydra: హైడ్రా కీలక నిర్ణయం.. ఒక్కో చెరువు వద్ద ఇద్దరు సెక్యూరిటీ గార్డులు..!

గత 50 సంవత్సరాలుగా హైదరాబాద్ లోని చెరువులు దాదాపు 60 శాతానికి పైగా కబ్జాకు గురయ్యాయి. భవిష్యత్ లో హైదరాబాద్ లో ఇక చెరువులు కనిపించకపోవచ్చు. అయితే దీన్ని సీరియస్ గా తీసుకున్న రాష్ట్ర ప్రభుత్వం చెరువుల పరిరక్షణకు హైడ్రా ఏర్పాటు చేసింది. కమిషనర్ గా రంగనాథ్ ను నియమించింది. హైడ్రా వచ్చిన నుంచి అక్రమార్కులు హడలిపోతున్నారు. ఇప్పటికే చాలా చోట్ల చెరువులను అక్రమించి నిర్మించిన నిర్మాణాలను హైడ్రా కూల్చి వేసింది.

చెరువు బఫర్ జోన్, ఎఫ్టీఎల్ లో నిర్మాణాలు చేపట్టొద్దని స్పష్టం చేసింది. తాజాగా చెరువులకు రక్షణ కల్పించాలని హైడ్రా నిర్ణయించింది. అందులో భాగంగా ఒక్కో చెరువు వద్ద ఇద్దరు చొప్పున సెక్యూరిటీ గార్డులను నియమించాలని ప్లాన్ చేస్తోంది. అలాగే చెరువుల సీసీ కెమెరాలు కూడా ఏర్పాటు చేయనున్నారు. భవిష్యత్ లో ఒక్క చెరువు కూడా కబ్జాకు గురి కాకుండా ఉండేందుకు ఈ నిర్ణయం తీసుకున్నారు. ప్రస్తుతం హైదరాబాద్ పరిధిలో 450 చెరువులు ఉన్నాయి.

ఇందులో ఓఆర్ఆర్ లోని మున్సిపాలిటీలు, పంచాయతీల్లో 300 చెరువులు, హైదరాబాద్ లో 185 చెరువులు ఉన్నాయి. ఈ చెరువుల వద్ద సెక్యూరిటీని ఏర్పాటు చేసే అవకాశం ఉంది. మొదటగా కొద్ది చెరువుల వద్ద సెక్యూరిటీ గార్డులను నియమించి.. కొద్ది రోజులు చూడనుంది. ఇది సక్సెస్ అయితే మిగతా చెరువుల వద్ద కూడా ఇదే పని చేయనుంది. మరోవైపు నాళాలను కూడా పరిరక్షించడానికి హైడ్రా ప్లాన్ చేస్తోంది. నాలాల సర్వే చేపట్టింది. షేక్ పేటలోని బల్కాపూర్ నాలా, టోలి చౌకి లోని నాలాపై సర్వే చేసింది.

ఈ ప్రాంతాల్లో దాదాపు 5కిలోమీటర్ల మేర ఈ నాలా విస్తరించి ఉండగా 3 కిలోమీటర్లు కబ్జాకు గురైంది. 2 కిలోమీటర్ల మేరా బాగుంది. భవిష్యత్ ఇది కూడా కబ్జాకు గురయ్యే అవకాశం ఉంది. ఈ నాలా పై సుమారు 50 అక్రమణలు ఉన్నట్లు గుర్తించారు. వాటిని ఇప్పుడు కూల్చివేయనున్నారు. ప్రస్తుతం హైడ్రా సైలెంట్ గా ఉంది. మరోసారి ఎప్పుడు కూల్చివేతలు చేపడుతుందో చూడాలి.

English summary

HYDRA decided to ensure that the ponds are not subject to encroachment. As part of this, security will be established at the ponds