Shamshabad Airport: శంషాబాద్ ఎయిర్ పోర్టులో భారీగా పట్టుబడిన బంగారం..

ఎన్ని చర్యలు తీసుకున్నా.. ఎన్నిసార్లు పట్టుబడినా బంగారం అక్రమ రవాణా ఆగడం లేదు. తాజాగా బంగారం, ఫారిన్ కరెన్సీని అక్రమంగా తరలిస్తున్న నలుగురు ప్రయాణికులను శంషాబాద్ ఎయిర్ పోర్టు కస్టమ్స్ అధికారులు పట్టుకున్నారు. మంగళవారం దుబాయ్, కువైట్ నుంచి శంషాబాద్ ఎయిర్ పోర్టుకు వచ్చిన ముగ్గురు వేర్వేరు ప్రయాణికులు బంగారాన్ని తరలిస్తున్నట్లు అధికారులు గుర్తించారు. వారి లాగేజీ తనిఖీ చేయగా.. ముగ్గురి నుంచి 1,657 గ్రాముల బంగారం లభిచింది. బంగారాన్ని అధికారులు స్వాధీనం చేసుకున్నారు.

ఈ బంగారం విలువ దాదాపు రూ.99 లక్షల వరకు ఉంటుందని అధికారులు అంచనా వేశారు. బహ్రెయిన్ నుంచి శంషాబాద్ ఎయిర్ పోర్టుకు వచ్చిన ఓ ప్యాసింజర్ ఫారిన్ కరెన్సీని తరలిస్తున్నట్లు అధికారులు గుర్తించారు. అతడిని అదుపులోకి తీసుకున్నారు. రూ.13 లక్షల విలువైన ఫారిన్ కరెన్సీని స్వాధీనం చేసుకున్నట్లు చెప్పారు. కాగా ఒక్క బంగారం, ఫారిన్ కరెన్సీ కాదు.. డ్రగ్స్ ను కూడా స్మగ్లింగ్ చేస్తునన్నారు. కొద్ది రోజుల క్రితం శంషాబాద్ ఎయిర్ పోర్టులో సింగపూర్, ఢిల్లీ నుంచి డ్రగ్స్ తరలిస్తున్న ముఠాను అధికారులు పట్టుకున్నారు.

ఓ వ్యక్తి డ్రగ్స్ ​ను నాలుగు మహిళా హ్యాండ్‌ బ్యాగుల్లో బ్రౌన్​ టేప్​తో చుట్టి చెక్​ ఇన్​ సూట్​కేసు అడుగు భాగంలో ఉంచాడు. ఆ ప్రయాణికుడు లావోస్​ నుంచి సింగపూర్​, హైదరాబాద్ మీదుగా ఢిల్లీ వెళ్తున్నాడు. అధికారులకు పక్కా సమాచారం రావడంతో ప్రయాణికుడిపై నిఘా పెట్టారు. నిందితుడి దగ్గర భారీ స్థాయిలో డ్రగ్స్ ను స్వాధీనం చేసుకున్నారు. రూ.50 కోట్ల విలువైన 5 కిలోల కొకైన్ ను అధికారులు పట్టుకున్నారు. ఎంత మంది పట్టుబడినా.. నిందితులు మాత్రం డ్రగ్స్​, బంగారం.. తదితర వాటిని తరలించడం మాత్రం ఆపడం లేదు.

అంతకు ముందు లోదుస్తుల్లో దాచి అక్రమంగా బంగారాన్ని తరలిస్తున్న ఓ వ్యక్తిని శంషాబాద్ ఎయిర్ పోర్టు కస్టమ్స్ అధికారులు అరెస్టు చేసిన సంగతి తెలిసిందే. ఇండిగో విమానంలో వచ్చిన ఓ ప్రయాణికుడి వద్ద 785 గ్రాముల అక్రమ బంగారాన్ని గుర్తించిన అధికారులు స్వాధీనం చేసుకున్నారు. నిందితుడిని అదుపులోకి తీసుకుని అధికారులు ఎయిర్ పోర్టు పోలీసులకు అప్పగించారు. మార్కెట్లో ఈ బంగారం విలువ రూ.47.49లక్షలు ఉంటుందని అధికారులు చెప్పారు.

English summary

No matter how many measures are taken, no matter how many times they are caught, gold smuggling does not stop. Shamshabad airport customs officials caught four passengers who were smuggling gold and foreign currency.