తార కేసు: సెక్స్ రాకెట్లో భర్త, లీడర్స్‌కి అమ్మాయిలను..!

By Srinivas

Updated: Monday, September 1, 2014, 13:44 [IST]

పాట్నా: నేషనల్ షూటర్ తార కేసులో అరెస్టైన ఆమె భర్త రకిబుల్ హుస్సేన్ ఖాన్ నివాసంలో జార్ఖండ్ పోలీసులు ఆదివారం సోదాలు చేశారు. ఈ సోదాల్లో రకిబుల్ అలియాస్ రంజిత్ సింగ్ కోహ్లీ నివాసం నుండి 36 సిమ్ కార్డులు, 15 మొబైల్ ఫోన్లు, రెండు కంప్యూటర్ సీపీయు తదితరాలను పోలీసులు స్వాధీనం చేసుకున్నారు.

పోలీసులు రకిబుల్ హుస్సేన్ ఖాన్‌ను అరెస్టు చేసి మూడు రోజుల పాటు విచారించారు. ఆయన తల్లిని కూడా విచారించారు. ఈ నేపథ్యంలో ఆయన నివాసంలో సోదాలు నిర్వహించారు.

దీనిపై పోలీసులు మాట్లాడుతూ.. సిమ్ కార్డులను పరిశీలిస్తామన్నారు. సీపీయులో ఏముందో చూస్తామని చెప్పారు. రకిబుల్ నివాసం నుండి తారా, కోహ్లీల పెళ్లి సీడీని కూడా స్వాధీనం చేసుకున్నట్లు పోలీసులు తెలిపారు.

మరోవైపు, బీజేపీ నేత రఘుబార్ దాస్ ఆదివారం తారా సహదేవ్ ఇంటికి వెళ్లి పరామర్శించారు. న్యాయం చేస్తామని హామీ ఇచ్చారు. తార తమకు సోదరి లాంటిదని, ఆమె తిరిగి షూటింగ్ ప్రాక్టీస్ చేసేందుకు రూ.లక్ష ఇస్తామని చెప్పారు. రకిబుల్ హుస్సేన్ ఖాన్‌కు ఎవరితో సంబంధాలు ఉన్నాయో తేల్చాలని ఆయా పార్టీలు డిమాండ్ చేస్తున్నాయి.

రకిబుల్ సెక్స్ రాకెట్ నడుపుతున్నాడా?

రకిబుల్ హుస్సేన్ ఖాన్ సెక్స్ రాకెట్ నడుపుతున్నాడా? అంటే కావొచ్చుననే వార్తలు వస్తున్నాయి. రకిబుల్ హుస్సేన్ ఖాన్‌కు పెద్ద రాజకీయ నాయకులు, బ్యూరోక్రాట్స్ తదితరులతో సంబంధాలు ఉన్నాయని వార్తలు వస్తున్నాయి. పోలీసుల విచారణలో రకిబుల్ ఈ విషయాలు వెల్లడించారట. తాను సెక్స్ రాకెట్ నడుపుతున్నట్లు రకిబుల్ పోలీసులకు చెప్పారట. చదువుకునే యువతులకు ఆశ చూపి వారిని సెక్స్ రాకెట్‌లోకి దింపుతున్నాడట. ఇతను ప్రముఖులకు యువతులను సప్లై చేస్తున్నట్లుగా పోలీసులు గుర్తించినట్లుగా తెలుస్తోంది.