ఘోరం: ఆలయంలో మహిళపై దాడి, జుట్టుపట్టి ఈడ్చిబయటపడేశారు

బెంగళూరు: కర్ణాటక రాజధాని బెంగళూరులో దారుణ ఘటన వెలుగుచూసింది. బెంగళూరులోని అమృతహళ్లిలోని లక్ష్మీ నరసింహ స్వామి ఆలయంలో ఓ మహిళపై దాడి జరిగింది. ఆమెను పదే పదే కొట్టారు. జుట్టుపట్టి ఆలయం నుంచి బయటకు ఈడ్చుకెళ్లారు. ఈ ఘటనకు సంబంధించిన వీడియో ఇప్పుడు సోషల్ మీడియాలో వైరల్‌గా మారింది.

ఈ సంఘటన డిసెంబర్ 21 న జరిగినట్లు తెలుస్తోంది. వీడియోలో.. మహిళ, ఆలయంలోని ఓ వ్యక్తి మధ్య వాగ్వాదం జరగడం చూడవచ్చు. మహిళ ఆలయం లోపల ఉంటానని పట్టుబట్టినట్లు కనిపిస్తుంది. అయితే, అతడు ఆమెను బయటకు వెళ్లగొడతాడు.

మహిళ ప్రతిఘటించడంతో ఆమెను తీవ్రంగా కొడతాడు. ఆమెను జుట్టు పట్టుకుని ఈడ్చుకెళ్లి బయటపడేస్తాడు. మరో ఇద్దరు పూజారులు కూడా ఈ వీడియోలో కనిపిస్తారు.

A Dalit woman is being assaulted and removed from the temple premises in Bangalore, India! pic.twitter.com/RkTiMT4yCe

— Ashok Swain (@ashoswai) January 6, 2023

ఆలయం బయటకు తీసుకొచ్చిన తర్వాత నిందితుడు కర్రతో కొట్టేందుకు ప్రయత్నించగా.. ఒక పూజారి అతడ్ని ఆపుతాడు. అయినా అతడు ఆగకుండా ఆమెపై దాడిని కొనసాగిస్తాడు. అయితే, బాధితురాలు దళిత మహిళ అని, ఆమెను ఆలయంలోనికి రాకుండా ఈ దాడి చేసినట్లు ఆరోపణలున్నాయి. ఈ వీడియో వైరల్ కావడంతో నెటిజన్ల నుంచి తీవ్ర ఆగ్రహం వ్యక్తం అవుతోంది. ఇలాంటి వారిని కఠినంగా శిక్షించాలని డిమాండ్లు వినిపిస్తున్నాయి.

వీడియో వైరల్ కావడంతో ఘటనపై స్పందించిన పోలీసులు.. నిందితులపై చర్యలు తీసుకుంటామని వెల్లడించారు.

English summary

A Woman dragged, repeatedly slapped in temple in Amruthahalli, Bengaluru.