జయప్రదకు షాక్: దేవయానికి ఎస్పీ రాంపూర్ టికెట్

By Pratap

Published: Friday, December 20, 2013, 15:49 [IST]

Azam Khan invites Devyani Khobragade to contest LS polls on SP ticket

న్యూఢిల్లీ: ఉత్తరప్రదేశ్‌లోని రాంపూర్ లోకసభ స్థానంలో సినీ తార జయప్రదకు ఝలక్ ఇవ్వడానికి ఆమె ప్రత్యర్థి, సమాజ్‌వాదీ పార్టీ నాయకుడు, రాష్ట్రమంత్రి ఆజం ఖాన్ మంచి ఎత్తుగడే వేసినట్లున్నారు. అమెరికా చేతిలో తీవ్రమైన అవమానానికి గురైన భారత దౌత్యవేత్త దేవయాని కోబ్రాగాడేకు వచ్చే ఎన్నికల్లో రాంపూర్ నుంచి పోటీకి పార్టీ టికెట్ ఇచ్చేందుకు ఆజంఖాన్ ముందుకు వచ్చారు.

దేవయానికి కోరుకుంటే ఉద్యోగానికి రాజీనామా చేసి రాంపూర్ నియోజకవర్గం నుంచి లోకసభకు పోటీ చేయడానికి తమ పార్టీ టికెట్ ఇస్తుందని ఆజంఖాన్ చెప్పారు. ఓ దౌత్యవేత్తను అమెరికా అవమానించిన తీరును చట్టసభలో వినిపించడానికి ఆ రకంగా వీలవుతుందని ఆయన అన్నారు.

అమెరికా ప్రతిసారీ భారతీయుల పట్ల అవమానకరంగా ప్రవర్తిస్తోందని ఆయన గురువారంనాడు విమర్శించారు. గతంలో అమెరికాకు వెళ్లినప్పుడు తనకు కూడా అవమానం జరిగిందని ఆయన గుర్తు చేసుకున్నారు. తన పట్ల అమెరికా ప్రవర్తించిన తీరుపై తాను తీవ్ర నిరసన వ్యక్తం చేసినట్లు ఆయన తెలిపారు.

కాగా, సినీ నటి జయప్రద ఎస్పీ తరఫున రాంపూర్ నుంచి పోటీ చేసి లోకసభకు ఎన్నికైన విషయం తెలిసిందే. అయితే, ఆమెను పార్టీ నుంచి సస్పెండ్ చేశారు. జయప్రద వచ్చే ఎన్నికల్లో ఆంద్రప్రదేశ్ రాష్ట్రం నుంచి పోటీ చేసేందుకు సిద్ధపడుతున్నారు.

Published On December 20, 2013