చైనాలో వెలుగుచూసిన కోవిడ్ కొత్త వేరియంట్ బీఎఫ్.7 కల్లోలం: భారత్‌లో మూడు కేసులు

న్యూఢిల్లీ: చైనాలో కరోనావైరస్ మహమ్మారి మరోసారి విజృంభిస్తోంది. కరోనా కేసులు ఒక్కసారిగా పెరగడానికి ఒమిక్రాన్ సబ్ వేరియంట్ బీఎఫ్7(BF.7) కారణమని నిపుణులు పేర్కొంటున్నారు. అయితే, తాజాగా, ఈ వేరియంట్ కేసులు భారతదేశంలోనూ నమోదు కావడం కలకలం రేపుతోంది.

బీఎఫ్7 వేరియంట్ తొలి కేసును గుజరాత్ బయోటక్నాలజీ రీసెర్చ్ సెంటర్ అక్టోబర్ నెలలోనే గుర్తించింది. దేశ వ్యాప్తంగా ఈ వేరియంట్ కేసులు ఇప్పటి వరకు మూడు నమోదైనట్లు ప్రభుత్వ వర్గాలు వెల్లడించాయి. గుజరాత్ రాష్ట్రంలో రెండు కేసులు నమోదు కాగా, మరో కేసు ఒడిశా రాష్ట్రంలో కనుకొన్నట్లు పేర్కొన్నాయి.

అయితే, మనదేశంలో బీఎఫ్7 కొత్త వేరియంట్ వెలుగు చూసినప్పటికీ కేసుల్లో పెరుగుదల గణనీయంగా లేదని నిపుణులు పేర్కొన్నారు. కోవిడ్‌పై కేంద్ర ఆరోగ్య శాఖ మంత్రి మన్సుఖ్ మాండవీయ ఏర్పాటు చేసిన సమావేశంలో నిపుణులు ఈ మేరకు తెలిపారు. వ్యాప్తిలో ఉన్న వేరియంట్లతోపాటు కొత్తగా బయటపడుతున్న వేరియంట్లపై ఎప్పటికప్పుడు పర్యవేక్షణ అవసరమని సూచించారు. ఈ క్రమంలోనే జీనోమ్ సీక్వెన్సింగ్ పౌ ప్రధానంగా దృష్టి పెట్టాలని రాష్ట్రాలకు కేంద్రం సూచించింది.

ఏంటీ బీఎఫ్7 వేరియంట్?

ఒమిక్రాన్ బీఏ.5కు చెందిన సబ్ వేరియేంటే ఈ బీఎఫ్.7. వేగంగా వ్యాప్తి చెందే ఈ వేరియంట్ కు బలమైన ఇన్ఫెక్షన్ కలిగించే సామర్థ్యం కూడా ఉంది. దీని ఇంక్యుబేషన్ వ్యవధి కూడా చాలా తక్కువ. అంతేగాక, రీఇన్ఫెక్షన్ లేదా వ్యాక్సిన్ తీసుకున్న వారికి కూడా ఇన్ఫెక్షన్ కలిగించే సామర్థ్యం ఈ వేరియంట్ కు ఉండటం గమనార్హం. అందుకే ఈ వేరియంట్ చైనాతోపాటు అమెరికా, కెనడా, బ్రిటన్, బెల్జియం, జర్మనీ, ఫ్రాన్స్, డెన్మార్క్ వంటి దేశాల్లో కేసుల పెరుగుదలకు కారణమవుతోంది.

English summary

Cases Of Covid Variant surge in China: Three BF7 cases Found In India.